შესაბამის განცხადებას კონკურენციის ეროვნული სააგენტო ავრცელებს.

რა ხდება: სააგენტომ USA2GEORGIA-ს მხრიდან მომხმარებელთა უფლებების შესაძლო დარღვევის ფაქტზე საქმის შესწავლა 19 დეკემბერს დაიწყო.

  • განმცხადებლები გადამზიდ კომპანიას უჩივიან, რომ მან წონის გამოთვლის წესი გაფრთხილების გარეშე შეცვალა და რეალური წონის ნაცვლად, მოცულობითი წონის გამოთვლის ფორმულა გამოიყენა, რამაც ღირებულება მკვეთრად გაზარდა.
  • ასევე, მომხმარებლები ამბობენ, რომ ონლაინმაღაზიების მიერ აშშ-ში მიტანილი ნივთები USA2GEORGIA-მ ვებგვერდზე დაგვიანებით ასახა, რის გამოც მათ გადაფუთვის მომსახურებით სარგებლობის უფლება შეეზღუდათ.

დეტალები: თბილისის საქალაქო სასამართლომ კონკურენციის ეროვნული სააგენტოს შუამდგომლობა დააკმაყოფილა — საბოლოო გადაწყვეტილების მიღებამდე მომხმარებლები ამანათებზე საკუთრების უფლებას ვეღარ დაკარგავენ.

  • კომპანიას აეკრძალა ამანათში არსებული პროდუქციის გასხვისება ან საკუთრებაში დატოვება იმ შემთხვევაშიც კი, თუკი მეპატრონეები 30 დღის ვადაში მათი საწყობში შენახვის ღირებულებას არ გადაიხდიან.

საბოლოო გადაწყვეტილებას კონკურენციის ეროვნული სააგენტო იანვრის ბოლომდე გამოაქვეყნებს.

  • დარღვევის დადასტურების შემთხვევაში, სააგენტო მოვაჭრეს ვადას განუსაზღვრავს და დარღვეული უფლების აღდგენას ან/და აკრძალული ქმედების შეწყვეტას მოსთხოვს.
  • გადაწყვეტილების დადგენილ ვადაში შეუსრულებლობის ან არაჯეროვნად შესრულების შემთხვევაში კი, მოვაჭრეს ეკისრება ჯარიმა გასული წლის ფინანსური ბრუნვის 2%-მდე მოცულობით.