ტრადიციული მილოცვა ახალი წლის დადგომამდე რამდენიმე წუთით ადრე გავრცელდა.

რატომ არის მნიშვნელოვანი: პრეზიდენტმა უკრაინაში რუსეთის აგრესიაზე, გეოპოლიტიკურ კონტექსტზე და ქართველების სოლიდარობაზე ისაუბრა.

• მან ოკუპირებულ ტერიტორიებზე მყოფებს მიმართა და პრემიერმინისტრის ბოლოდროინდელ განცხადებასაც გამოეხმაურა.
• "სრულდება 2022 წელი. რაც იყო, იყო და ალბათ, არ გვინდა ახლა, ამას ჩავუღრმავდეთ", — ასე დაიწყო ზურაბიშვილმა მილოცვა.

დეტალები: პრეზიდენტმა განაცხადა, რომ ეს წელი ყველაზე მძიმე იყო უკრაინელებისთვის და მათ მსოფლიოს აჩვენეს, რას ნიშნავს შემართება, ბოლომდე ბრძოლა ქვეყნის დამოუკიდებლობისა და თავისუფლებისათვის და ჩვენი, ყველას თავისუფლებისთვის.

• "ქართველმა ხალხმა კარგად იცის რას ნიშნავს ეს ბრძოლა და მას გავლილი აქვს ეს ძალიან მძიმე გზა, ამიტომაც ქართველმა ხალხმა არნახული სოლიდარობა გამოიჩინა და ყველა შესაძლო ფორმით გამოხატა თავისი მეგობარი ქვეყანის მიმართ, რომ მის გვერდით დგას", — თქვა მან.

ევროპული პერსპექტივა: პრეზიდენტმა განაცხადა, რომ ეს წელი დიდი და ახალი იმედების წელი იყო, ევროპული იმედების წელი და ნაწილობრივ — იმედგაცრუების.

• "მაგრამ ჩვენ მივიღეთ, რაც ყველაზე მნიშვნელოვანია — ევროპული პერსპექტივა, რამაც სამუდამოდ დაასრულა ის გეოგრაფიული კითხვის ნიშნები, რაც საქართველოს მიმართ არსებობდა — ვართ თუ არა ევროპაში. პერსპექტივა იმას ნიშნავს, რომ ყველა ერთხმად აღიარებს, რომ ვართ".
• "ჩვენ მხოლოდ ის უნდა დავამტკიცოთ, რომ ის ჩვენი, ქართული ღირებულებები, რაც ამავდროულად, ევროპული ღირებულებებია, არის ის, რაც დღეს გვამოძრავებს. ამას თუ დავამტკიცებთ (და ეს ჩვენში პრაქტიკულად არსებობს), ჩვენ იმ იმედგაცრუებასაც გადავლახავთ და 2023 წელი, ნამდვილად, ევროპის წელი იქნება".

2023 წელი: პრეზიდენტმა ახალგაზრდებს უსურვა, რომ ეს მათი წელი იყოს, რადგან მათთვის არის ქართული, ევროპული მომავალი.

• "მინდა, რომ თქვენ, ამ ქვეყანას აღარ ტოვებდეთ, და პირიქით, ბრუნდებოდეთ, რადგან დღეს, თქვენ ამ ქვეყანას ყველაზე მეტად სჭირდებით", — განაცხადა მან.
• ასევე, მიართა დიასპორას და თქვა, რომ "დღეს, ალბათ, დაბრუნების დროა", რადგან ევროპული პერსპექტივა მათზეცაა დამოკიდებული.
• "თქვენ ხართ ის, ვისაც შეუძლია აქ ჩამოიტანოს სწორედ ის წესები და სტანდარტები, რომელიც ესოდენ გვჭირდება. თქვენ უნდა ჩამოხვიდეთ აქ, რადგან არ უნდა დატოვოთ ამ ქვეყანაში სიცარიელე, რომელიც შემდეგ სხვებისგან იქნება შევსებული".

პასუხი ღარიბაშვილს: რამდენიმე დღის წინ ირაკლი ღარიბაშვილმა თქვა, რომ ქვეყნის გაერთიანების შემთქვევაში აფხაზეთში და სამაჩაბლოში მასშტაბური ინვესტიცია შეუძლიათ და აფხაზეთს აქვს პოტენციალი, გახდეს მეორე მონაკო.

• ზურაბიშვილმა კი დღეს განაცხადა, რომ ჩვენს მოქალაქეებს ოკუპირებულ ტერიტორიებზე დღევანდელი ყოფის გამარტივება სჭირდებათ.
• "ძალიან მძიმე პირობებში მყოფებს, რამეთუ ომი მათზე ვრცელდება პირდაპირ, თუ ირიბად და ჩვენ ჩვენს ადგილზე უნდა ვიდგეთ, თქვენ გვერდზე და თქვენ გვერდით უნდა ვიყოთ, რათა ყველანაირად დავიცვათ თქვენი იდენტობა, თქვენი ენა და ჩვენი ერთად ყოფნა".
• "მე არ ვიცი, ეს მონაკო იქნება, თუ სხვა რამ, მაგრამ მე ვიცი, რომ ჩვენ უნდა გიადვილებდეთ დღევანდელ ყოფას, თქვენზე უნდა ვრცელდებოდეს და ბევრად ადვილად გაძლევდეთ მოქალაქეობის საბუთებს, რათა თქვენ საქართველოდან შეძლოთ ევროპასთან დაახლოება".

დასასრულს, პრეზიდენტმა პატრიარქს ახალი წელი და დაბადების დღე მიულოცა.

• "მინდა ვთქვა, რომ თქვენ ჩვენთვის მომავალი წლისთვის და შემდეგაც, ასევე, დიდი იმედის მომცემი ხართ", — განაცხადა მან.