ამის შესახებ საუბარია მედიის განვითარების ფონდის (MDF-ის) ანგარიშში — რეკლამისა და ინფორმაციის გავრცელების მიზნით მედიაში საბიუჯეტო თანხების განაწილების პრაქტიკა.

რატომ არის მნიშვნელოვანი: ანგარიშში განხილულია, როგორ ნაწილდება საბიუჯეტო კონტრაქტები სხვადასხვა ტიპის მედიაზე, ასევე — როგორ სარედაქციო პოლიტიკას ატარებენ ეს მედიები.

  • MDF-ის თანახმად, 2021 წელს საბიუჯეტო ორგანიზაციებმა სარეკლამო და საინფორმაციო მომსახურების მიზნით მედიასაშუალებებთან 4 808 129 ლარის კონტრაქტი გააფორმეს.

დეტალები: 2021 წელს საბიუჯეტო კონტრაქტების ყველაზე დიდი წილი (35,6%) ონლაინ მედიაზე მოდის, 16,4 % — ნაციონალური და შერეული დაფარვის ტელევიზიებზე, 16,4% — რეგიონულ ტელევიზიებზე, თითქმის ამდენივე — სოციალურ მედიაზე, 7,3 % — ბეჭდურ მედიაზე, დანარჩენი კი შერეულ კონტრაქტებსა და რადიოებზე ნაწილდება.

  • როგორც ანგარიშის ავტორები ამბობენ, ტელევიზიების შემთხვევაში კონტრაქტების განაწილება რეიტინგებთან შესაბამისობაშია.
  • ტელეკომპანია იმედთან 285 647 ლარის ხელშეკრულება გაფორმდა, მას მოსდევს მთავარი არხი — 141 957 ლარით და რუსთავი 2 — 110 192 ლარით.
  • რეგიონულ მაუწყებლებს შორის ყველაზე დიდი საბიუჯეტო თანხა ქვემო ქართლის ტელევიზიას აქვს მიღებული და ის მთლიანი შემოსავლის 80%-ს შეადგენს.

ყველაზე მეტი თანხა — 1 713 476 ლარი, ონლაინ მედიის კონტრაქტებზე იყო გათვალისწინებული, საიდანაც ყველაზე დიდი წილი პალიტრა მედია ჰოლდინგში შემავალ გამოცემებზე მოდის, მას მოსდევს Kvira.ge და მასთან დაკავშირებული გამოცემები.

  • ბეჭდურ მედიაში ყველაზე მეტი ღირებულების ხელშეკრულება გაზეთ
    რეზონანსთან გაფორმდა, რეგიონულში კი — გაზეთ ბორჯომთან.

წინა წლების მსგავსად საინფორმაციო მომსახურების მიზნით მედია საშუალებების შერჩევის დროს საჯარო უწყებები, ანგარიშის თანახმად, მკაცრად გაწერილი კრიტერიუმებითა და ანტიდისკრიმინაციული პოლიტიკით არ ხელმძღვანელობდნენ.

  • "2021 წელსაც კვლავ გაფორმდა სერვის კონტრაქტი გაზეთ საქართველოს რესპუბლიკასთან, რომლის სარედაქციო პოლიტიკა ჰომოფობიური და ანტიდასავლურია" — ვკითხულობთ კვლევაში.
  • ასევე, როგორც ანგარიშიდან ირკვევა, საბიუჯეტო კონტრაქტები გაფორმდა ონლაინ გამოცემა სივრცეებთანაც, რომელსაც — როგორც სახელისუფლებო სარედაქციო პოლიტიკა, ასევე, კრემლისტურ აქტორებთან მჭიდრო კავშირები აქვს.

გამოიკვეთა შემთხვევა, როდესაც საბიუჯეტო კონტრაქტების მქონე ზოგიერთი მედია საშუალება ტროლის კომენტარს რუსეთის მოქალაქის მოპარული ფოტოთი ონლაინ სააგენტოს ვებგვერდზე, როგორც რეალური პირისას, აქვეყნებდა.