აფგან მუხტარლის ადვოკატები მოითხოვენ, რომ აზერბაიჯანელი ჟურნალისტის საქმე პროკურატურამ გამოიძიოს და შესაბამისი მოთხოვნით უწყებას დღეს, 5 ივნისს მიმართეს. ადვოკატის, არჩილ ჩაფიკაშვილის თქმით, ის, რომ საქმეს დღემდე შსს იძიებს ირიბად მიანიშნებს, რომ მასში პოლიციელების ან სხვა თანამდებობების პირების მონაწილეობის ვერსია არ განიხილება:

"ოჯახს აქვს ეჭვი, რომ ამ დანაშაულის ჩადენაში შესაძლოა ჩართულები იყვნენ საჯარო მოხელეები, კონკრეტულად პოლიციელებზე იყო განცხადება გაკეთებული. კანონის მიხედვით, როდესაც საუბარია პოლიციელის, ან საჯარო მოხელის, სავარაუდო დანაშაულთან დაკავშირებით საქმე არის პროკურატურის ქვემდბარე. ასევე, საქმის სირთულიდან და მნიშვნელობიდან გამომდინარე, ყოველგვარი საფუძველი არსებობს, რომ გამოიძიოს პროკურატურამ."

მუხტარლის ამბობს, რომ მისი გამტაცებლები კრიმინალური პოლიციის ფორმაში იყვნენ გამოწყობილი.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.