ემანუელ მაკრონის გადაწყვეტილებით, 18-დან 25 წლამდე ახალგაზრდებისთვის საფრანგეთში პრეზერვატივი უფასო იქნება. ამის შესახებ საფრანგეთის პრეზიდენტმა თავის ინსტაგრამზე დაწერა.

"18-25 წლის მოზარდებისთვის აფთიაქებში პრეზერვატივი უფასო იქნება. ეს პირველი იანვრიდან დაიწყება, რაც პრევენციაში პატარა რევოლუციაა", — წერს მაკრონი. პრეზიდენტმა ხაზი გაუსვა იმ ფაქტს, რომ ახალგაზრდებში სქესობრივი გზით გადამდები დაავადებების მაჩვენებელი იზრდება, ახალი გადაწყვეტილებით კი, სწორედ ამის პრევენცია მოხდება.

ფოტო: Getty Images

საფრანგეთის პრეზიდენტმა სქესობრივი განათლების შესახებაც ისაუბრა და აღნიშნა, რომ ამ მიმართულებით მეტის გაკეთებაა საჭირო. "სქესობრივი განათლების საკითხში კარგად ვერ ვართ. რეალობა თეორიისგან ძალიან განსხვავებულია. ეს ის სფეროა, რომელშიც ჩვენი მასწავლებლებისთვის ბევრად უკეთესი განათლება გვჭირდება", — განაცხადა მაკრონმა.

პრეზიდენტმა დასძინა, რომ ახალგაზრდების ჯანმრთელობა ერთ-ერთია იმ საკითხთაგან, რომელსაც დიდი ყურადღება უნდა დაეთმოს. რაც შეეხება პრეზერვატივების ღირებულებას, ამას ჯანდაცვის ეროვნული სისტემა ანაზღაურებს.