9 დეკემბერს თბილისის ადამიანის უფლებათა სახლი უფლებადამცველების საერთაშორისო დღეს აღნიშნავს.

ღონისძიებას გახსნის ნორვეგიის სამეფოს ელჩი საქართველოში ჰელენე სანდ ანდრესენი, თბილისის ადამიანის უფლებათა სახლის გამგეობის თავმჯდომარე ბაია პატარაია და ადამიანის უფლებათა სახლის კოორდინატორი ნათია თავბერიძე.

პოეტი რატი ამაღლობელი ისაუბრებს კულტურული წრეების შეზღუდვის ტენდენციებზე. პანელური დისკუსიის თემა კი "ბრძოლა ადამიანის უფლებებისთვის — უფრო მნიშვნელოვანი, ვიდრე ოდესმე" იქნება.

ღონისძიების დასასრულს, გამოვლინდებიან პრემია "ლექსოს" 2022 წლის გამარჯვებულები.

"ლექსო — პრემია უფლებადამცველი მედია პროფესიონალებისთვის" ადამიანის უფლებათა სახლმა 2021 წლის 5 ივლისს, ჟურნალისტებზე განხორციელებული ძალადობისა და TV პირველის ოპერატორის, ლექსო ლაშქარავას გარდაცვალების შემდეგ დააწესა. პრემიის მიზანი საქართველოში უფლებადამცველი მედიის მხარდაჭერა, შენარჩუნება და მისი შემდგომი განვითარებაა.

დამოუკიდებელი ჟიურის გადაწყვეტილებით, პრემიაზე ნომინირებულები არიან ტელეკომპანია ფორმულას, TV პირველის, რადიო თავისუფლებას, OC Media-ს, On.ge-ის, ბათუმელების და JAMnews-ის თანამშრომლები.

პრემია "ლექსო" მხარდაჭერილია ნორვეგიული ორგანიზაცია Human Rights House Foundation-ის მიერ. პრემიის პარტნიორია საერთაშორისო ორგანიზაცია ომისა და მშვიდობის გაშუქების ინსტიტუტი (IWPR).

ღონისძიებას ნორვეგიის სამეფოს, ნიდერლანდების სამეფოს და სხვა ქვეყნების ელჩები საქართველოში, ადგილობრივი და საერთაშორისო ორგანიზაციების თანამშრომლები და დიპლომატიური კორპუსის სხვა წარმომადგენლები დაესწრებიან.

ღონისძიება ფაბრიკას საკონფერენციო დარბაზში, 16 საათზე დაიწყება.