კავკასიის კვლევითი რესურსების ცენტრის (CRRC) კვლევის მიხედვით, 2016 წელს მოსახლეობის იმ 65%-დან, რომელიც თავს დასაქმებულად არ მიიჩნევს, 47% სამსახურის პოვნით დაინტერესებული არ არის.

TI-ის ცნობით, ეს მონაცემი საქართველოს დაახლოებით 980 ათას მოქალაქეს უდრის და ეს მაჩვენებელი 2015 წლის მონაცემებთან შედარებით ფაქტობრივად არ შეცვლილა.

2016 წელს მოსახლეობის იმ 65%-დან ვინც თავს დასაქმებულად არ თვლის 76% (1,583 ათასი მოქალაქე) ბოლო 4 კვირის განმავლობაში არც კი ეძებდა სამსახურს. ეს მაჩვენებელი 2015 წლის მონაცემთან შედარებით 5 პროცენტული პუნქტით არის გაზრდილი.

2016 წელს უმუშევართა 65%-დან 46% (960 ათასი მოქალაქე) მომავალი ორი კვირის განმავლობაში არ იყო მზად სამსახურის დასაწყებად. ეს მაჩვენებლები წინა წლის მონაცემებთან შედარებით ფაქტობრივად არ შეცვლილა.

საერთაშორისო გამჭვირვალობა - საქართველოს დაკვეთით კავკასიის კვლევითი რესურსების ცენტრმა (CRRC) მთელი ქვეყნის მასშტაბით გამოკითხვა ჩაატარა, რომელშიც მონაწილეობა 2032 ადამიანმა მიიღო.

კვლევა 2016 წლის 15-28 მარტს ჩატარდა.