რა შეიძლება გადაგხდეს თავს, როცა საკუთარი ქვეყნის საგულშემატკივროდ ფეხბურთის მსოფლიო ჩემპიონატზე შორეულ მხარეში მიემგზავრები?

როგორც ჩანს, სულ თავისუფლად შეიძლება, ლუდის მოსაძებნად წახვიდე, საბოლოოდ კი, შეიხის სასახლეში აღმოჩნდე ლომებთან, მაიმუნებთან და სხვა ეგზოტიკურ ცხოველებთან სტუმრად.

ორი ინგლისელი გულშემატკივარი, რომელიც კატარში ფეხბურთის მსოფლიო ჩემპიონატის მატჩებზე დასასწრებად ჩავიდა, ლუდის საძებნელად წავიდა. გზად ისინი ადგილობრივებს გადაეყარნენ — ნავაფსა და აბდულ აზიზს. ერთ-ერთი მათგანი ირწმუნებოდა, რომ შეიხის შვილი იყო, თუმცა, სტუმრებს ამისი დაჯერება, როგორც ჩანს, გაუჭირდათ. ამიტომ, მათ სახლისკენ გაჰყვნენ და მოულოდნელ სანახაობასაც შეესწრნენ.

ტოიოტა ლენდ კრუიზერით სასახლეში მისული ინგლისელები ეგზოტიკურ ჩიტებს, მაიმუნებსა და ლომებს შეხვდნენ. სპორტულ გამოცემა talkSPORT-თან საუბარში ერთ-ერთი გულშემატკივარი, ალექსი, იხსენებს, რომ "მშვენიერი დრო გაატარეს".

"წუხელ ერთ-ერთი შეიხის შვილს შევხვდით, რომელმაც სასახლეში წაგვიყვანა და ყველაფერი გვაჩვენა, ლომები და ამბები", — ჰყვება მეორე ფანი, ჯონი, — "გულთბილად დაგხვდნენ და ამას რა ჯობია".

ჯონისა და ალექსის ამბავი ინტერნეტს ვირუსულად მოედო. ტვიტერზე კი არა მხოლოდ მათი ინტერვიუ გავრცელდა, არამედ ვიდეოც, სადაც ჩანს, როგორ ეთამაშება ალექსი ლომის ბოკვერს.

აი, ის ამბავი კი სულაც არაა გასაკვირი, რომ ინგლისელი სტუმრები კატარში ლუდს დაეძებდნენ. მსოფლიო ჩემპიონატის დაწყებამდე ორი დღით ადრე ცნობილი გახდა, რომ მასშტაბური ღონისძიების პერიოდში სტადიონებზე ალკოჰოლური სასმელების გაყიდვა აიკრძალებოდა.