რამდენადაც ვიცით, მჯდომარე ცხოვრების წესი ჯანმრთელობისთვის სასარგებლო არ არის, მაგრამ ზუსტად რამდენი ვარჯიშია საჭირო იმისათვის, რომ დიდი დროის განმავლობაში ჯდომის ნეგატიური ეფექტები თავიდან ავირიდოთ? კვლევამ აჩვენა, რომ დღეში, დაახლოებით, 30-40 წუთის განმავლობაში ვარჯიშს ამის ძალა შესწევს.

40 წუთამდე "ზომიერი და ენერგიული ინტენსივობის ფიზიკური აქტივობა" ყოველდღიურად საკმარისია 10 საათი უძრავად ჯდომის დასაბალანსებლად, თუმცა ნებისმიერი ვარჯიში ან თუნდაც ფეხზე დგომა გარკვეულწილად ხელს გვიწყობს.

ასევე იხილეთ: საშუალო ინტენსივობის ვარჯიშსაც კი შეუძლია ტვინის ზომის მნიშვნელოვნად გაზრდა — ახალი კვლევა

დასკვნა ეფუძნება 2020 წელს გამოქვეყნებულ მეტაანალიზს. ამ უკანასკნელმა მოიცვა 9 წინა კვლევა, ჯამში 44 370 ადამიანით, რომლებიც ატარებდნენ ფიტნეს თრექერებს, 4 სხვადასხვა ქვეყნიდან. ანალიზმა აჩვენა, რომ მჯდომარე ცხოვრების წესის მქონე ადამიანებში სიკვდილის რისკი იზრდება, როცა ფიზიკური აქტივობის დონე მცირდება.

"აქტიურ ადამიანებში, რომლებიც კავდებიან, დაახლოებით, 30-40 წუთი ზომიერი და ენერგიული ინტენსივობის ფიზიკური აქტივობით, კავშირი დიდი ხნით ჯდომასა და სიკვდილის რისკს შორის მნიშვნელოვნად არ განსხვავდება იმ ადამიანებისგან, რომლებიც მცირე დროს ატარებენ მჯდომარე პოზაში", — განმარტეს მკვლევრებმა თავიანთ ნაშრომში.

ფოტო: Popsugar

სხვა სიტყვებით რომ ვთქვათ, გონივრულად ინტენსიურ აქტივობებს — ველოსიპედით სიარული, სწრაფი სიარული, მებაღეობა — შეუძლია შეამციროს თქვენი ადრეული სიკვდილის რისკი იმ დონემდე, რაც გექნებოდათ მჯდომარე ცხოვრების წესის არქონის შემთხვევაში. ეს კავშირი ვლინდება ათასობით ადამიანის შესახებ შეგროვებულ მონაცემებში.

ასევე იხილეთ: სიმსივნე, დემენცია, გულ-სისხლძარღვთა დაავადებები, სიკვდილი — ყველაფრის რისკს ამ ერთი აქტივობით შეამცირებთ

"ნებისმიერი ფიზიკური აქტივობა მნიშვნელოვანია და მისი მცირე რაოდენობა უკეთესია, ვიდრე საერთოდ არარსებობა", — აღნიშნა ფიზიკური აქტივობისა და მოსახლეობის ჯანმრთელობის მკვლევარმა ემანუელ სტამატაკისმა ავსტრალიის სიდნეის უნივერსიტეტიდან.

ფიტნეს თრექერებზე დაფუძნებული კვლევა ძირითადად შეესაბამება WHO-ს (მსოფლიო ჯანდაცვის ორგანიზაცია) 2020 წლის გაიდლაინებს, რომლებიც რეკომენდაციას უწევს 150-300 წუთის განმავლობაში ზომიერი ინტენსივობის ან 75-150 წუთით ენერგიული ინტენსივობის ფიზიკურ აქტივობას ყოველ კვირას.

ლიფტით ასვლის ნაცვლად კიბეებზე ასვლა, ბავშვებთან და შინაურ ცხოველებთან თამაში, იოგაში ან ცეკვაში ვარჯიში, საოჯახო საქმეების კეთება, ფეხით სიარული და ველოსიპედით სეირნობა — ეს ყველაფერი შემოთავაზებულია, როგორც გზები, რომლითაც ადამიანები შეიძლება იყვნენ უფრო აქტიური. ამდენად, თუკი დაუყოვნებლივ 30-40-წუთიან ვარჯიშზე ვერ გადახვალთ, შეგიძლიათ, პატარ-პატარა ნაბიჯებით დაიწყოთ.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.