მთავარმა პროკურორმა ირაკლი შოთაძემ აზერბაიჯანელი ჟურნალისტის, აფგან მუხთარლის საქმესთან დაკავშირებით განაცხადა, რომ მისთვის არც რაიმე კონსულტაციების შესახება არის ცნობილი და ვერც იმას იტყვის, თუ როგორ დატოვა ჟურნალისტმა ქვეყანა პასპორტის გარეშე. ამის შესეხაბ, მან დღეს, 31 მაისს, პოლიციელის დღესთან დაკავშირებით გამართული ღონისძიების შემდეგ ისაუბრა:

"მე ვერ გეტყვით, როგორ დატოვა მან ქვეყანა. ჩემთვის არანაირი კონსულტაციის შესახებ არ არის ცნობილი. მე შემიძლია გითხრათ, რომ შსს-ში დაწყებულია გამოძიება და ჩატარდება ყველა საგამოძიებო მოქმედებები. გამოძიების ინტერესებიდან გამომდინარე, დეტალებზე ვერ ვისაუბრებ".

აღნიშნულ საქმეზე, შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს.

აზერბაიჯანელი ჟურნალისტი აფგან მუხთარლი თბილისში დაიკარგა. ის 29 მაისს, სახლიდან პასპორტის გარეშე გავიდა და არ დაბრუნებულა.

ამჟამად, მუხთარლი ბაქოში, სახელმწიფო სასაზღვრო სერვისის საგამოძიებო განყოფილებაში იმყოფება.