პირს მორგანთან ინტერვიუში კანიე ვესტმა, რომელიც თავს ახლა Ye-ს უწოდებს, განაცხადა, რომ ფილმი Django Unchained მისი იდეით იყო შთაგონებული. რეპერის თქმით, ეს იდეა სიმღერის ვიდეოსთან დაკავშირებით ჰქონდა და კვენტინ ტარანტინოს და ჯეიმი ფოქსს უამბო 2005 წელს. ახლა კი ვესტი ტარანტინოს მის მოპარვაში ადანაშაულებს.

კანიეს თქმით, მან და ჯეიმი ფოქსმა 2005 წელს სიმღერაზე Gold Digger ითანამშრომლეს, რა დროსაც რეპერმა ფოქსს და ტარანტინოს სიმღერის ვიდეოს იდეა გაუზიარა — მთავარი თემა შავკანიანთა მონობა უნდა ყოფილიყო. რეპერი აცხადებს, რომ მისი იდეები ჩაფიქრებული კლიპისთვის შემდეგ კვენტინმა და ჯეიმიმ გამოიყენეს ფილმში.

"ჯანგოს იდეა ჩემგან აიღეს, მე გავუზიარე ეს აზრი Gold Digger-ის ვიდეოსთვის. შემდეგ კი ტარანტინომ ეს ფილმად აქცია."

ფოტო: Courtesy Everett Collection

თუ ეს მართლაც ასე მოხდა, როგორც ჩანს, ვესტმა ჯეიმი ფოქსს აპატია. რეპერმა ახლა უკვე წაშლილ ინსტაგრამ პოსტში მიმდევრებს ჰკითხა, მასზე ფილმი რომ გადაეღოთ, ვის შეეძლო, ეთამაშა მისი როლი.

"ჩემი არჩევანი ჯეიმი ფოქსია," — დაწერა მან. — "ერთ-ერთი ყველაზე დიდი გენიოსი."