შინაგან საქმეთა სამინისტროს განცხადებით, ბრალდებულს 22 ოქტომბერს ლაღიძის ქუჩაზე, ურთიერთშელაპარაკება მოუვიდა ოთხ პირთან, რა დროსაც მათი მიმართულებით ხელყუმბარა ისროლა და შემთხვევის ადგილიდან მიიმალა.

დეტალები: ხელყუმბარის აფეთქების შედეგად 3 პირი დაშავდა. მათ კლინიკაში სამედიცინო დახმარება უტარდებათ.

  • გამოძიება სამი პირის მიმართ დამამძიმებელ გარემოებაში ჩადენილ განზრახ მკვლელობის მცდელობის, ასევე, ასაფეთქებელი მოწყობილობის მართლსაწინააღმდეგო შეძენა-შენახვისა და ტარების ფაქტზე, სისხლის სამართლის კოდექსის 19-109-ე და 236-ე მუხლებით მიმდინარეობს.
  • დანაშაული 16-დან 20 წლამდე ან უვადო თავისუფლების აღკვეთას ითვალისწინებს.

დაკავებული პირის ადვოკატის განცხადებით, მისი დაცვის ქვეშ მყოფი პირი ამბობს, რომ ყუმბარა მხოლოდ საკუთარი სიცოცხლის გადასარჩენად გამოიყენა.

  • მისივე თქმით, ბრალდებულს არათუ განზრახ მკვლელობის მცდელობა, არამედ არავისთვის ზიანის მიყენება არ სურდა.