თბილისის სახელმწიფო უნივერსიტეტში რექტორის მოვალეობის შემსრულებლის არჩევნები დასრულდა. ინფორმაცია ამის შესახებ On.ge-ს თსუ-ის პრესსამსახურში დაუდასტურეს.

რატომ არის მნიშვნელოვანი: დღეს დილიდან არჩევნები სტუდენტების პროტესტისა და ხმაურის ფონზე მიმდინარეობდა.

• ისინი განმარტავდნენ, რომ მოვალეობის შემსრულებელი წესდების თანახმად, უნდა აერჩია სამეცნიერო და აკადემიური წრეების ყველა წარმომადგენელს, თუმცა დადგენილება შეცვალეს, რითაც ეს უფლებამოსილება აკადემიურ საბჭოს მიენიჭა.
• "ამ ცვლილებებზე დაყრდნობით, შეგვიძლია ვივარაუდოთ, რომ სამუშიამ, შესაძლოა, მოგვიანებით კენჭი რექტორის პოზიციაზეც იყაროს", — ამბობდნენ ისინი.
• სამუშია აკადემიურმა საბჭომ 30-დან 28 ხმით დაამტკიცა, ხოლო ორი ბიულეტენი გაბათილდა.

დეტალები: დღეს სტუდენტები აცხადებდნენ იმასაც, რომ ნებისმიერი წესდება, ეს იქნება განათლების შესახებ კანონი, თუ რექტორის არჩევის წესი, ძირითადად ორიენტირებულია იმაზე, რომ "კომფორტული პირობები შექმნან და სწორედ ის კანდიდატი დანიშნონ, რომელიც პოლიტიკურად და პარტიულად ანგაჟირებულ ადამიანებს სჭირდებათ".

• მათივე თქმით, არჩევნებს ლეგიტიმურად არ ცნობენ. ამბობენ, რომ აკადემიური საბჭოს უფლებამოსილება უნდა შეიზღუდოს, რადგან ის არაა დამოუკიდებელი ორგანო სახელმწიფოსა და უნივერსიტეტში პრივილეგირებული ჯგუფების დაკვეთას.
• "თბილისის სახელმწიფო უნივერსიტეტს დღეს რექტორი არ ჰყავს, ჩვენ ამ პოზიციაზე ვრჩებით".

სამუშია თსუ-ის ჰუმანიტარული ფაკულტეტის პროფესორია. ის ასევე იყო თბილისის საკრებულოს წევრი ქართული ოცნებიდან.

• ინტერპრესნიუსისთვის მიცემულ ინტერვიუში ამტკიცებდა, რომ თუ უნივერსიტეტის აკადემიური საბჭო მის კანდიდატურას მხარს დაუჭერს, ის ყველა პრობლემურ საკითხს პროფესორებსა და სტუდენტებთან ერთად გაივლის.

წესდების თანახმად, მოვალეობის შესრულებისთვის განსაზღვრული 6-თვიანი ვადის შემდეგ გამოცხადდება კონკურსი რექტორის შესარჩევად.

არქივიდან: თსუ-ს რექტორმა გიორგი შარვაშიძემ თანამდებობიდან გადადგომის მოთხოვნით აკადემიურ საბჭოს 7 ოქტომბერს მიმართა.

• შარვაშიძე ივანე ჯავახიშვილის სახელობის თბილისის სახელმწიფო უნივერსიტეტის რექტორის თანამდებობაზე 2016-2020 წლებში პირველი ვადით, 2020 წლიდან კი მეორე ვადით იყო არჩეული.

• მისი გადადგომის შემდეგ, სხვადასხვა მედიაში ვრცელდებოდა ინფორმაცია, რომ თსუ-ის რექტორის თანამდებობას სამუშია დაიკავებდა. მას facebook-ზე მილოცვებსაც უწერენ და წარმატებებს უსურვებდნენ.

• თსუ-ის სტუდენტურმა მოძრაობაში ამბობდნენ, რომ "უნივერსიტეტის კლანურ მმართველობას წინასწარ აქვს განსაზღვრული თუ ვინ გახდება რექტორი". წერდნენ იმასაც, რომ სტუდენტები მათ ამის შესაძლებლობას არ მისცემდნენ.

• გავრცელებული ინფორმაციის საპასუხოდ სამუშიამ პოსტი გამოაქვეყნა და აღნიშნა, რომ წუხდა, რადგან ბევრმა ადამიანმა ეს ინფორმაცია სანდოდ მიიღო.