ევროკავშირმა და ამერიკის შეერთებულმა შტატებმა საერთო, დასავლური ღირებულებები უნდა დაიცვან და არა თავიანთი ინტერესები, - განაცხადა ევროკავშირის საბჭოს პრეზიდენტმა, დონალდ ტუსკმა და თქვა, რომ ესაა მისი მთავარი მესიჯი, აშშ-ის პრეზიდენტ დონალდ ტრამპისთვის:

"ის, რაც ჩვენს მეგობრობასა და თანამშრომლობას ასაზრდოებს, ესაა დასავლური ღირებულებები, ისეთი როგორებიცაა, თავისუფლება, ადამიანის უფლებები და ღირსება. დღეს ჩვენი უდიდესი დავალებაა, სწორედ ამ ღირებულებების გარშემო გავაერთიანოთ თავისუფალი სამყარო და არა მხოლოდ ინტერესების".

დღეს, 25 მაისს, დონალდ ტუსკმა დონალდ ტრამპს ევროკავშირის საბჭოში უმასპინძლა. შეხვედრას დაესწრნენ ევროკომისიის პრეზიდენტი, ჟან კლოდ იუნკერი, ევროპარლამენტის პრეზიდენტი ანტონიო ტაიანი და ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში ფედერიკა მოგერინი. პრეზიდენტის რანგში, ეს იყო ტრამპის პირველი შეხვედრა ევროკავშირის ლიდერებთან.

მათი საუბრის მთავარი თემები იყო საგარეო პოლიტიკა, უსაფრთხოება, კლიმატის ცვლილება, ვაჭრობა და ბრექსიტი.

შეხვედრის დასრულების შემდეგ გამართულ პრესკონფერენციაზე, ტუსკმა საუბრის შედეგებზე ისაუბრა:

"ჩემი შთაბეჭდილებით, ჩვენ ბევრ საკითხზე შევთანხმდით, ისეთზე, როგორიცაა ტერორიზმის წინააღმდეგ ბრძოლა, თუმცა, ზოგიერთი თემა ღია რჩება, მაგალითად, კლიმატი და ვაჭრობა".

დონალდ ტუსკმა რუსეთთან ურთიერთობაზეც გაამახვილა ყურადღება:

"არ ვარ დარწმუნებული, რომ მე და პრეზიდენტს საერთო აზრი გაგვაჩნია რუსეთის შესახებ, მიუხედავად ამისა, როდესაც საქმე ეხება უკრაინის კონფლიქტს, შემიძლია ვთქვა, რომ აქ ერთ აზრზე ვართ".