ოკუპირებული აფხაზეთის დე ფაქტო მინისტრის კომენტარს რუსული პროპაგანდისტული მედია ავრცელებს.

რატომ არის მნიშვნელოვანი: ინფორმაციას იმის შესახებ, რომ ბელარუსის პრეზიდენტი საქართველოს ოკუპირებულ ტერიტორიაზე ჩავიდა, მწვავე კრიტიკა მოყვა.

• ამას გამოეხმაურნენ საქართველოს ხელისუფლების წარმომადგენლებიც და ლუკაშენკოს საქციელი დაგმეს.

რას ამბობს არძინბა: მისი თქმით, ბელარუსს განიხილავენ, როგორც მნიშვნელოვან მიმართულებას მათი საგარეო პოლიტიკისთვის.

• დე ფაქტო მინისტრი, ასევე, ამბობს, რომ "მესამე ქვეყნების რეაქცია ამ ვიზიტზე, მაგალითად საქართველოსი, მათ არ ადარდებთ".

კონტექსტი: ბელარუსს საქართველოს ოკუპირებული ტერიტორიების დამოუკიდებლობა აღიარებული არ აქვს და საქართველოსთან დიპლომატიურ ურთიერთობებს ინარჩუნებს.

• ბელარუსის პრეზიდენტის ეს ნაბიჯი, შესაძლოა, საქართველოსთან ურთიერთობის დაძაბვის მიზეზი გახდეს.
• ლუკაშენკოს აფხაზეთში ჩასვლა ნიშნავს, რომ მან დაარღვია საქართველოს კანონი ოკუპაციის შესახებ, რომლის თანახმად ზუგდიდისა და გორის მუნიციპალიტეტების მიმართულებების გარდა, ყველა სხვა მიმართულებიდან ოკუპირებულ ტერიტორიებზე შესვლა უცხო ქვეყნის მოქალაქეებისათვის და მოქალაქეობის არმქონე პირებისათვის აკრძალულია და ისჯება საქართველოს სისხლის სამართლის კოდექსით.

რა ვიცით ლუკაშენკოს ჩასვლაზე: აფხაზური მედიების ინფორმაციით, ლუკაშენკო დე ფაქტო პრეზიდენტს ბიჭვინთის "სახელმწიფო აგარაკზე" შეხვდა. ეს ოფიციალიურად დაანონსებული არ ყოფილა, მაგრამ წინ უძღოდა ლუკაშენკოს ვიზიტი სოჭში, სადაც ვლადიმერ პუტინს ესაუბრა.

• ბელარუსის პრეზიდენტს არ დაუმალავს, რომ აფხაზეთში მისი ჩასვლა პუტინის ინიციატივაა და თქვა: "გუშინ ჩვენ განვიხილეთ აფხაზეთის პრობლემები ჩვენს უფროს ძმასთან, ვლადიმერ პუტინთან ერთად. ბევრი ვიმსჯელეთ ამ საკითხებზე, ღამემდე და მივედით ერთ დასკვნამდე, რომ აფხაზეთის მიტოვება არ შეიძლება".
• გავრცელებული ფოტო-ვიდეოების მიხედვით, მას ცეკვით და ზეიმით დახვდნენ და ისიც თბილად მიესალმა ბჟანიას.
• დე ფაქტო რეჟიმის ვიდეოებში ლუკაშენკოს არცერთხელ არ მოუხსენებია აფხაზეთი, როგორც რესპუბლიკა, მაგრამ ორმხრივი ურთიერთობების აუცილებლობაზე ისაუბრა და თქვა: "ჩვენ მივედით ერთ დასკვნამდე, რომ აფხაზეთი არის, მას რუკიდან ვერ წაშლი, ვერანაირი სანქცია ამას ვერ იზამს".
• "ჩვენ გვინდა დავამყაროთ არა მხოლოდ მეგობრობის ხიდი, არამედ ძალიან სერიოზული ურთიერთობები", — განაცხადა მან და თან ამტკიცებდა, თითქოს ამ ნაბიჯს იმის გამო არ დგამას, რომ ბელარუსს პრობლემები შეექმნა.
• გარდა ამისა, ლუკაშენკო ამტკიცებდა იმასაც, რომ არავისთვის ცუდი არ უნდათ, მათ შორის, არც საქართველოსთვის.
• "ჩვენ ჩამოვედით სიკეთით. თუ რამით შეგვიძლია თქვენი დახმარება, თან ეს იქნება ორმხრივად მომგებიანი თანამშრომლობა, მისი მიმართულებები კი არსებობს, ჩვენ ამას გავაკეთებთ", — განაცხადა მან.