ინფორმაცია ამის შესახებ რადიო თავისუფლების პროექტმა, ეხო კავკაზამ წყაროზე დაყრდნობით გაავრცელა. იმავეს წერს აფხაზეთის დე ფაქტო რეჟიმის სააგენტო Apsnypress ე.წ. საგარეო საქმეთა სამინისტროს მედია ცენტრზე დაყრდნობით.

დეტალები: შეგახსენებთ, რომ რამდენიმე დღის წინ ლუკაშენკო სოჭში რუსეთის პრეზიდენტს შეხვდა. ახლა კი Apsnypress-ის ინფორმაციით, ლუკაშენკო ოკუპირებული აფხაზეთის დე ფაქტო რესპუბლიკის პრეზიდენტ ასლან ბჟანიას ხვდება.

  • გამოცემა წერს, რომ დღის წესრიგშია ორმხრივი თანამშრომლობის, სავაჭრო-ეკონომიკური თანამშრომლობის საკითხები, საერთაშორისო სიტუაციის ანალიზი, არსებული გამოწვევებისა და საფრთხეების განხილვა.
  • ტელეგრამ არხებზე АМРА- life და D News Abkhazia ვრცელდება ფოტო-ვიდეოები, რომლებიც, სავარაუდოდ, ბელარუსის პრეზიდენტის კორტეჟის გადაადგილებას და ბიჭვინთაში მის დასახვედრად მზადებას ასახავს.
  • გარდა ამისა, Нужная Газета წერს, რომ ოფიციალური ინფორმაცია ვიზიტისა და მიზნის შესახებ არ ვრცელდება, მაგრამ ცნობილია, რომ შეხვედრა (დაუკონკრეტებელ პირთან) ბიჭვინთის "სახელმწიფო აგარაკზე" მიმდინარეობს.
  • მათივე თქმით, გავრცელებულ ფოტოში "სახელმწიფო არხის" ოპერატორი ჩანს, რაც მიანიშნებს, რომ ვიზიტზე საღამოს AGTRK-ის ეთერში გახდება ცნობილი.
  • განახლება: ერთ-ერთმა აფხაზურმა მედიამ გაავრელა კადრი, რომელზეც ბჟანიას და ლუკაშენკო ერთად ჩანს.

რატომ არის მნიშვნელოვანი: ბელარუსს საქართველოს ოკუპირებული ტერიტორიების დამოუკიდებლობა აღიარებული არ აქვს და საქართველოსთან დიპლომატიურ ურთიერთობებს ინარჩუნებს.

  • ბელარუსის პრეზიდენტის ეს ვიზიტი, შესაძლოა, საქართველოსთან ურთიერთობის დაძაბვის მიზეზი გახდეს.
  • ლუკაშენკოს აფხაზეთში ჩასვლა ნიშნავს, რომ მან დაარღვია საქართველოს კანონი ოკუპაციის შესახებ.

ოკუპაციის შესახებ კანონის თანახმად, ზუგდიდისა და გორის მუნიციპალიტეტების მიმართულებების გარდა, ყველა სხვა მიმართულებიდან ოკუპირებულ ტერიტორიებზე შესვლა უცხო ქვეყნის მოქალაქეებისათვის და მოქალაქეობის არმქონე პირებისათვის აკრძალულია და ისჯება საქართველოს სისხლის სამართლის კოდექსით.

  • კანონში აღნიშნულია, რომ განსაკუთრებულ შემთხვევაში შეიძლება გაიცეს ოკუპირებულ ტერიტორიაზე აკრძალული მიმართულებებიდან შესვლის სპეციალური ნებართვა საქართველოს მთავრობის სამართლებრივი აქტით დადგენილი წესით, თუ ეს ემსახურება საქართველოს სახელმწიფო ინტერესებს, კონფლიქტის მშვიდობიანი მოგვარების, დეოკუპაციის, ომით დაზარალებულ მოსახლეობას შორის ნდობის აღდგენის ან ჰუმანიტარულ მიზნებს.
  • წესი არ ვრცელდება იმ პირზე, რომელიც ოკუპირებულ ტერიტორიებზე ახორციელებს გადაუდებელ ჰუმანიტარულ დახმარებას მოსახლეობის სიცოცხლის უფლების უზრუნველსაყოფად, კერძოდ, მოსახლეობას უზრუნველყოფს საკვებით, მედიკამენტებითა და პირველადი მოთხოვნილების საგნებით; ასევე, იმ პირზე, რომელზედაც გაცემულია პირადობის ნეიტრალური მოწმობა ან/და ნეიტრალური სამგზავრო დოკუმენტი

On.ge დაუკავშირდა საქართველოს საგარეო საქმეთა სამინისტროს, მათი პასუხის მიღებისთანავე მასალა განახლდება.

  • განახლება: საგარეომ განცხადება გაავრცელა, რომლის ნახვაც შეგიძლიათ აქ.
  • ასევე ინფორმაციის დაზუსტებამდე კომენტარი გააკეთა ქართული ოცნების დეპუტატმა მიხეილ სარჯველაძემ, რომელმაც თქვა, რომ თუ ოკუპირებულ აფხაზეთში იმყოფება, ამაზე პასუხს სცემს კანონმდებლობა.
  • "თუმცა აქვე მინდა ვთქვა, რომ ამ დრომდე ნამდვილად არ გვქონია პრობლემა ბელარუსიის მხრიდან საქართველოს ტერიტორიული მთლიანობის აღიარებისა და მეეჭვება, რომ აპირებდეს ამ პოზიციისგან გადახვევას", — თქვა სარჯველაძემ.