პარტიაში აღნიშნავენ, რომ "გარკვეული ადამიანების მცირე ჯგუფის მიერ გავრცელებული ყალბი ინფორმაციისა და დესტრუქციული ნაბიჯების გამო" იმ განცხადების გაკეთება უწევთ, რაც სხვა შემთხვევაში მათთვის პრიორიტეტული არ იქნებოდა.

რატომ არის მნიშვნელოვანი: ბოლო პერიოდში მედიაში ვრცელდებოდა ცნობები, რომ ნაციონალურ მოძრაობაში დაპირისპირებაა.

  • ენმ-ში ამბობენ, რომ ოპოზიციაში ჩანერგილ ჯაშუშებთან დაკავშირებით TV პირველის სიუჟეტში ერთ-ერთი პირის ხმა საპროტესტო აქტივობებში ჩართულ აქტიურ ადამიანს მიამსგავსეს;
  • მათი თქმით, საკითხის გარკვევის მიზნით მასთან და მისი გუნდის წევრებთან კომუნიკაცია მოხდა — ერთი კვირის წინ ისინი პარტიის ოფისში მივიდნენ, თუმცა რამდენიმე მათგანი "უკიდურესად აგრესიულად განწყობილი" იყო.

დეტალები: ნაციონალური მოძრაობა აღნიშნავს, რომ პარტიის გენერალურმა მდივანმა და იმ ადამიანმა, ვის მიმართაც კითხვები არსებობდა, ისაუბრეს, რის შემდეგაც საკითხი ამოიწურა და კითხვის ნიშნები მოიხსნა.

  • "მოგვიანებით ამ პირების ნაწილის სურვილით პარტიის თავმჯდომარე საკუთარ სამუშაო ოთახში მშვიდ ვითარებაში ხვდებოდა ჯგუფის რამდენიმე წარმომადგენელს, რა დროსაც იქ შეიჭრა გიორგი მუმლაძე თანმხლებ პირებთან ერთად";
  • "მან შეურაცხმყოფელი, ქუჩური ტერმინოლოგიით სცადა პროვოკაციის მოწყობა. ბუნებრივია, პარტიაში მყოფმა პარტიის წევრებმა აღკვეთეს მათი მცდელობა და ეს ადამიანები ოფისიდან გაყვანილ იქნენ".

ენმ ამბობს, რომ ეს ამით არ დასრულებულა და რამდენიმე დღის შემდეგ, როდესაც ნიკა მელია საზოგადოებრივი მაუწყებლის პოლიტიკურ გადაცემაში იმყოფებოდა, გიორგი მუმლაძე იქ ჯგუფთან ერთად მივიდა.

  • მათი თქმით, მუმლაძემ ეს "პროვოკაციის მოწყობის მიზნით განზრახ" გააკეთა და სიტყვიერი შეურაცხყოფა მიაყენა ნიკა მელიას მძღოლს;
  • ენმ აღნიშნავს, რომ ამ თემაზე საჯაროდ საუბარს არ აპირებდნენ, თუმცა "რადგან რამდენიმე ადამიანმა საკუთარი პირადი მიზნების მისაღწევად გადაწყვიტა მცდარი ინფორმაციის გავრცელება", პოზიციის დაფიქსირება გადაწყვიტეს.

"რუსული ოცნების სტრატეგია": პარტიაში ამბობენ, რომ მმართველ პარტიას საზოგადოებაში უიმედობისა და ნიჰილიზმის გაჩენა სურს.

  • "ამ მიზნით მათ არაერთხელ უცდიათ პროვოკაციების მოწყობა და ოპოზიციურ პარტიებში დაპირისპირების სურათის შექმნა";
  • "სამწუხაროა, რომ ამ ადამიანების მიერ განხორციელებული ნაბიჯები და განცხადებები ნებსით თუ უნებლიედ ოცნების წისქვილზე ასხამს წყალს";
  • "აგრეთვე აღნიშნული ქმედებები ქმნიან ხელსაყრელ გარემოს, რათა ოლიგარქის მიერ მიტაცებულმა სამართალდამცავმა ორგანოებმა პარტიის აქტიურ წევრებზე ყალბი სისხლის სამართლის საქმეების აღძვრისა და პოლიტიკური დევნის ახალი ტალღა წამოიწყონ".

"მთავარი აქცენტი": ენმ-ში აცხადებენ, რომ ახლა ყურადღება "ივანიშვილის რეჟიმის საბოლოო დამარცხებას" უნდა დაუთმონ.

  • "ჩვენ არ უნდა შევუწყოთ ხელი "რუსული ოცნების" სტრატეგიას, რომელიც ითვალისწინებს მთავარ ოპოზიციურ პარტიაში დაპირისპირებისა და შიდა განხეთქილების განცდის შექმნას";
  • "რიგ საკითხებთან დაკავშირებით შეიძლება არსებობდეს განსხვავებული პოზიციები, რაზეც დემოკრატიულობისა და გამჭვირვალობის პრინციპიდან გამომდინარე პარტიაში დისკუსია საჯაროდ მიმდინარეობს. ეს ჩვენი არჩევანია, რადგან ანგარიშვალდებულად ვგრძნობთ თავს ჩვენს ამომრჩეველთან".

პარტიაში მიუთითებენ, რომ ნაციონალური მოძრაობა ერთიანია სტრატეგიაში, რომელიც მიხეილ სააკაშვილის, ნიკა გვარამიასა და სხვა პოლიტიკური პატიმრების გათავისუფლება ეხება.

  • ასევე, ერთიანია, რომ ხელისუფლების ცვლილება ვადამდელი არჩევნების გზით მოხდეს, დაჩქარებული ტემპით აუცილებელი რეფორმები გატარდეს და საქართველომ ევროკავშირის წევრობის კანდიდატობა მიიღოს;
  • "ჩვენ ღია ვართ დისკუსიისთვის, როგორ დავაჩქაროთ ოლიგარქის მმართველობის დასასრული საქართველოში. ჩვენთვის პარტიის არჩეული თავმჯდომარის და პარტიის მმართველობის მიმართ კრიტიკული და საქმიანი შენიშვნები მისასალმებელია";
  • "ამავე დროს, შეურაცხყოფა და ურთიერთობის ქუჩური წესი მიუღებელი და დაუშვებელია".