საქართველოს ჯანდაცვის მინისტრის მედიისა და საზოგადოებასთან ურთიერთობის საკითხებში მრჩეველი, ნინო შუბლაძე TV პირველის საზოგადოებრივ-პოლიტიკური მიმართულების ხელმძღვანელი ხდება. ამის შესახებ On.ge-ს თავად შუბლაძემ განუცხადა.

როგორც შუბლაძე ამბობს, ის კვირის ბოლომდე კვლავ იმუშავებს ჯანდაცვის სამინისტროში.

"არ გადავსულვარ ჯერ. უბრალოდ, მოლაპარაკებები მიმდინარეობდა და დავთანხმდი. ჩემს ხელმძღვანელსაც შევატყობინე. აქ დავასრულებ და ჩემს პროფესიაში დავბრუნდები სამწლიანი პაუზის შემდეგ," - თქვა შუბლაძემ.

იმის მიუხედავად, რომ შუბლაძე TV პირველში გადასვლამდე კვლავ ჯანდაცვის სამინისტროს თანამშრომელია, მიაჩნია, რომ მედიაში მუშაობის დროს უწყების მიმართ, საჭიროების შემთხვევაში, კრიტიკას არ მოერიდებიან.

ნინო შუბლაძე წლების განმავლობაში რუსთავი 2-ში მუშაობდა, იყო არხის გენერალური დირექტორის მოადგილე, საინფორმაციო სამსახურის ხელმძღვანელიც და საზოგადოებრივ-პოლიტიკური ტოქშოუს წამყვანი. მან არხი 2014 წელს დატოვა. თანამდებობის დატოვებას წინ უსწრებდა მისსა და რუსთავი 2-ის გენერალური დირექტორის, ნიკა გვარამიას სამუშაო ოთახებში აღმოჩენილი ჩანაწერების გასაჯაროება.

"ამ გადაწყვეტილებას არანაირი პოლიტიკური სარჩული არ აქვს და ძალიან ვთხოვ ყველას არ აქციონ ეს პოლიტიკური სპეკულაციების თემად. ჩემი გადაწყვეტილების ერთადერთი მოტივაცია პირადი და ოჯახური მდგომარეობითაა ნაკარნახევი," - წერდა თანამდებობის დატოვების შემდეგ შუბლაძე სოციალურ ქსელში.