ნეტფლიქსის ერთ-ერთი ყველაზე პოპულარული სერიალი Stranger Things უამრავ საინტერესო და დასამახსოვრებელ პერსონაჟს აერთიანებს, რომელთა შორისაც მხოლოდ ერთი ფავორიტის დასახელება მარტივი არაა. მაყურებლის საყვარელ პერსონაჟებს შორის რობინიცაა, რომელიც მესამე სეზონში გამოჩნდა და თავი მალევე შეგვაყვარა.

თურმე რობინის როლის შემსრულებელს, მაია ჰოუკს, უნდა, რომ პერსონაჟი სერიალის ბოლო, მეხუთე სეზონში გმირულად მოკვდეს. ამის შესახებ მან გამოცემა Rolling Stone-თან ინტერვიუში ისაუბრა:

"ბოლო სეზონია, ამიტომ, ადამიანები, ალბათ, დაიხოცებიან. მინდა, ჩემი პერსონაჟიც მოკვდეს და გმირული მომენტი ჰქონდეს. ნებისმიერი სხვა მსახიობის მსგავსად, მეც დიდი სიამოვნებით მოვკვდებოდი გმირულად", — განაცხადა მაიამ.

მიუხედავად იმისა, რომ მეოთხე სეზონი სერიალის ერთ-ერთი საყვარელი გმირის სიკვდილით დასრულდა, Stranger Things-ის შემქმნელები, ძმები დაფერები, მთავარი პერსონაჟების მოკვლას თავს არიდებენ.

ამის გამო დაფერები სერიალის მსახიობებმაც გააკრიტიკეს. მაია ჰოუკის თქმით, შემქმნელებს პერსონაჟები იმდენად უყვართ, რომ მათ ვერ ელევიან. მილი ბობი ბრაუნი (ილევენი) და ნოა შნაპიც (უილი) თვლიან, რომ სერიალს უკვე ზედმეტად ბევრი მთავარი პერსონაჟი ჰყავს.

იმ შემთხვევაში, თუ რობინი გმირულად არ მოკვდება, მაია ჰოუკის თქმით, კიდევ ერთ სერიალზე იქნება თანახმა, რომელშიც მთავარი გმირები რობინი და ჯო კირის პერსონაჟი, სტივი იქნებიან.