Hulu-ს ერთ-ერთი ყველაზე პოპულარული სერიალის, მხევლის წიგნის, მეხუთე სეზონს, რომლის პრემიერაც 14 სექტემბერს შედგება, ყველანი სულმოუთქმელად ველით. პრემიერამდე კი ისიც გავიგეთ, რომ ჯუნის თავგადასავალი მეექვსე სეზონით დასრულდება.

აღსანიშნავია, რომ მეექვსე სეზონით მხევლის წიგნის სამყაროს საბოლოოდ არ გამოვემშვიდობებით. შემქმნელების განცხადებით, უკვე მუშაობენ ახალ სერიალზე, რომელიც მარგარეტ ეტვუდის წიგნის, The Testaments-ის მიხედვით იქნება გადაღებული. წიგნში მოვლენების მხევლის წიგნში მოთხრობილი ისტორიის დასრულებიდან წლების შემდეგ მიმდინარეობს.

რაც შეეხება მეხუთე სეზონს, მისი ოფიციალური აღწერით თუ ვიმსჯელებთ, წინ დაუვიწყარი ისტორია გველის: "ჯუნი მეთაური უოტერფორდის მკვლელობის შედეგებს იმკის, პარალელურად კი უჭირს საკუთარი პიროვნებისა და მიზნის ხელახლა განსაზღვრა. დაქვრივებული სერენა ცდილობს, ტორონტოში პოპულარულობა მოიპოვოს, კანადაში კი თანდათანობით გილეადის გავლენა იზრდება.

მეთაური ლოურენსი დეიდა ლიდიასთან ერთად გილეადის გარდაქმნასა და ძალაუფლების მოპოვებას ცდილობს. ჯუნი, ლუკი და მოირა გილეადის წინააღმდეგ შორიდან იბრძვიან და ჰანას გადარჩენასა და მის დაბრუნებას ცდილობენ".

ემის მფლობელი სერიალი მარგარეტ ეტვუდის ამავე სახელწოდების მქონე დისტოპიური ნოველის მიხედვითაა გადაღებული. მაყურებლებმა მხევლის წიგნი პირველად 2017 წელს იხილეს და ის უამრავი ადამიანის საყვარელ სერიალად იქცა.