ამის შესახებ პარტიის ოფისში გამართულ ბრიფინგზე ქართული ოცნების თავმჯდომარემ, ირაკლი კობახიძემ განაცხადა.

რატომ არის მნიშვნელოვანი: კობახიძე განმარტავს, რომ გენერალური პროკურორის არჩევის წესის გადასინჯვა ევროკავშირის 12 პუნქტის ნაწილია.

რა ითვალისწინებს: პარტიის თავმჯდომარის თქმით, ამ კანონპროექტით, მომდევნო ორი მოწვევის პარლამენტი გენპროკურორს 3/5-ის ხმათა უმრავლესობით აირჩევს 6 წლის ვადით.

  • იმ შემთხვევაში, თუ კანდიდატი ხმების 3/5-ს ვერ მიიღებს, გენერალური პროკურორი ერთი წლის ვადით აირჩევა ხმათა უმრავლესობით.
  • კობახიძის განცხადებით, კანონპროექტის შინაარსი მმართველობის სისტემის ლოგიკას, ელემენტარულ სამართლებრივ პრინციპებს ეწინააღმდეგება და სწორედ ამ მიზეზით შეაჩერეს შარშან შესაბამისი საკონსტიტუციო ცვლილების მიღება.
  • თუმცა, მისივე თქმით, 12 პუნქტის შესრულება მათთვის პრიორიტეტია და ერთჯერადად სამართლებრივ პრინციპებზე თვალს დახუჭავენ, გენერალური პროკურორის არჩევის ახალ წესს ყოველგვარი წინაპირობის გარეშე მიიღებენ.
  • კობახიძე ამბობს, რომ გუშინ საპარლამენტო უმრავლესობამ ოფიციალურად დააინიცირა კონსტიტუციური კანონის პროექტი ზუსტად იმ შინაარსით, რომელიც შარშან შეჯერდა უმრავლესობასა და საპარლამენტო ოპოზიციას შორის გამართული კონსულტაციების საფუძველზე.

ფართო სურათი: მიშელის დოკუმენტის შესაბამისად, კანონპროექტი გულისხმობდა საპროკურორო საბჭოს მიერ წარდგენილი კანდიდატის არჩევას ე.წ. კვალიფიციური უმრავლესობის, ანუ პარლამენტის სრული შემადგენლობის 3/5-ის, ანუ 90 დეპუტატის თანხმობის საფუძველზე.