ვოლოდიმირ ზელენსკიმ დემნა გვასალია უკრაინის სახელმწიფო ორდენით დააჯილდოვა.

უკრაინის პრეზიდენტის ოფიციალურ ვებგვერდზე გამოქვეყნდა იმ ათეულობით პოლიტიკოსის, ხელოვანისა თუ ბიზნესმენის სია, რომელთაც ვოლოდიმირ ზელენსკის განკარგულებით, "უკრაინის სახელმწიფო სუვერენიტეტისა და ტერიტორიული მთლიანობის მხარდაჭერისა და მსოფლიოში უკრაინის პოპულარიზაციაში მნიშვნელოვანი წვლილისთვის" სახელმწიფო ორდენი გადაეცემათ.

მათ შორისაა მოდის სახლ ბალენსიაგას ამჟამინდელი შემოქმედებითი ხელმძღვანელი, ქართველი დიზაინერი დემნა გვასალია, რომელმაც 2022 წლის მარტში გამართული მოდის ჩვენება უკრაინას მიუძღვნა.

მოგვიანებით დემნა უკრაინის მხარდასაჭერად შექმნილი საქველმოქმედო პლატფორმა UNITED24-ის ელჩიც გახდა და ბალენსიაგას სპეციალური სამოსიც გამოუშვა, რომლის გაყიდვებიდან შემოსული თანხა მთლიანად უკრაინაში რუსეთის აგრესიისგან დაზარალებული მოსახლეობის დასახმარებლად გადაირიცხება.

დემნა უკრაინის მხარდაჭერისთვის მესამე ხარისხის სახელმწიფო ორდენით დაჯილდოვდა.

აღსანიშნავია, რომ უკრაინის სახელმწიფო ჯილდო კიდევ ერთ ქართველს გადაეცა: ლანა ღვინჯილია, რომელიც არასამთავრობო ორგანიზაცია Populus Rei-ის თანადამფუძნებელი და ანტისაოკუპაციო მოძრაობის "ძალა ერთობაშია" მმართველი კომიტეტის წევრია.

2021 წელს ღირსების მედლით დემნა გვასალია საქართველოს პრეზიდენტმა სალომე ზურაბიშვილმაც დააჯილდოვა.