მედიის ცნობით, ევროკავშირის საგარეო საქმეთა მინისტრები ამ კვირაში აპირებენ, რომ ბლოკის ვიზების გამარტივებულად გაცემის პროცედურის შეჩერებას მხარი დაუჭირონ.

რატომ არის მნიშვნელოვანი: მოსკოვსა და EU-ს შორის სავიზო რეჟიმის გამარტივების შესახებ შეთანხმება 2007 წელს გაფორმდა.

  • მისი გაუქმება რუსეთის მოქალაქეებისთვის გაართულებს და უფრო გააძვირებს შენგენის ზონის დოკუმენტების მიღებას.

დეტალები: FT წერს, რომ რუსეთის მოქალაქეებისთვის ევროკავშირში ტურისტული ვიზებით მოგზაურობის შეზღუდვის მიზნით, ზოგიერთი ქვეყანა ერთობლივ ქმედებებს ითხოვს.

  • მედიას წყაროები უყვებიან, რომ პრაღაში ორდღიანი შეხვედრის ფარგლებში მინისტრები გეგმავენ, რომ ამ შეთანხმების გაუქმებით პოლიტიკური მხარდაჭერა გამოხატონ.
  • "მიუღებელია, რომ რუსმა ტურისტებმა ჩვენს ქალაქებში, ნავსადგურებზე ისეირნონ. სიგნალი უნდა გავუგზავნოთ რუსეთის მოსახლეობას, რომ ეს ომი არ არის კარგი, მიუღებელია", — უთხრა მედიას მოლაპარაკებებში მონაწილე ერთ-ერთმა მაღალჩინოსანმა.

თუმცა ზოგიერთი ქვეყანა, მათ შორის, გერმანია პირდაპირი აკრძალვის წინააღმდეგია.

  • ამ იდეას არ იზიარებს გერმანიის კანცლერი და ამბობს, ეს "პუტინის ომია";
  • სრული აკრძალვის წინააღმდეგია ევროკავშირის უმაღლესი წარმომადგენელი, ჯოზეფ ბორელიც — "არ ვფიქრობ, რომ მშვიდობიან მოსახლეობასთან ურთიერთობის გაწყვეტა დაგვეხმარება და არ მგონია, რომ ამ იდეას საჭირო ერთსულოვნება ექნება".