რუსულმა კომპანია ინტერ რაომ დღეს, 2 მაისს, გაასაჯაროვა ინფორმაცია შპს მტკვარი ენერგეტიკის 100%-ის გასხვისების შესახებ. კომპანიაში არ ადასტურებენ კონკრეტულად ვინ გახდა შემსყიდველი. მათ მიერ გავრცელებულ ოფიციალურ განცხადებაში წერია, რომ შემსყიდველია "საერთაშორისო ინვესტორთა კონსორციუმი". ჯერჯერობით, უცნობია გარიგების ღირებულება.

შპს მტკვარი ენერგეტიკა გარდაბანში ფლობს თბოელექტროსადგურს, რომელიც 2 ენერგობლოკისგან შედგება. თითოეული ენერგობლოკის სიმძლავრე 300 მეგავატია და ისინი 1990-იან წლებში ააგეს. აღნიშნული თბოელექტროსადგური ბუნებრივ გაზზე მუშაობს.

ინტერ რაოს მენეჯმენტის წარმომადგენლის, ილნარ მირსიაპოვის განცხადებით, კომპანიის სტრატეგიულ გეგმაში შედის 2020 წლამდე ბიზნესის განვითარება რუსეთის ფედერაციის ტერიტორიაზე, თუმცა, კომპანია ამასთანავე აგრძელებს საქმიანობას სხვადასხვა მიმართულებით საქართველოშიც.

რუსული კომპანია ინტერ რაო, რომლის მფლობელებიც სხვადასხვა რუსული სახელმწიფო კომპანიები არიან, საქართველოში ამ დრომდე ფლობს სააქციო საზოგადოება თელასს, ასევე ხრამჰესი 1-სა და ხრამჰესი 2-ს, გარდა ამისა, საქართველოს აღნიშნულ კომპანიასთან გაფორმებული აქვს მემორანდუმი ენგურჰესის ერთობლივ მართვასთან დაკავშირებით.