ავსტრიაში რუსეთის მუდმივი წარმომადგენლის, მიხაილ ულიანოვის ტვიტის გამო უკრაინა ავსტრიას მის გაძევებასა და პერსონა ნონ გრანტად გამოცხადებას სთხოვს.

რატომ არის მნიშვნელოვანი: "არავითარი წყალობა უკრაინის მოსახლეობას", — დაწერა ულიანოვმა ტვიტერზე.

  • ასეთი კომენტარი გააკეთა მან უკრაინის პრეზიდენტის იმ ტვიტზე, სადაც ზელენსკი აშშ-ს მადლობას უხდიდა დამატებითი სამხედრო დახმარებისთვის.
  • პოსტი აღარ იძებნება, როგორც მედიები წერენ, ულიანოვ მოგვიანებით თქვა, რომ მისი შინაარსი არასწორად გაიგეს.

დეტალები: ტვიტის შემდეგ უკრაინის არაერთმა ოფიციალურმა პირმა თქვა, რომ ეს იყო გენოციდისკენ მოწოდება და გამოხატავდა მთლიანად რუსეთის სურვილს.

  • უკრაინის რადას თავმჯდომარემ ტვიტერზე ავსტრიის პრეზიდენტი და პრემიერმინისტრი მონიშნა და თქვა, რომ გაუკვირდა, როდესაც ავსტრიაში საელჩოდან ასეთი განცხადება მოისმინა
  • "მიხაილ ულიანოვი ავსტრიაში პერსონა ნონ გრატად უნდა იყოს აღიარებული და ქვეყნიდან გაძევებული", — წერს რუსლან სტეფანჩუკი.

უკრაინის საგარეო: უწყებამ ავსტრიას მოუწოდა ქვეყნიდან გააძევონ ულიანოვი.

  • "გენოციდის ეს ენა დაუშვებელია. ჩვენ მოვუწოდებთ ვენის მთელ დიპლომატიურ საზოგადოებას ბოიკოტი გამოუცხადოს ულიანოვს, ხოლო მასპინძელ ქვეყანას ავსტრიას გამოაცხადოს ის პერსონა ნონ გრატად", — წერს საგარეოს სპიკერი.

ავსტრიის საგარეო: უწყებაში ამბობენ, რომ აღშფოთებულები არიან რუსეთის მუდმივი წარმომადგენლის მიერ გაკეთებული არაადამიანური განცხადებებით.

  • "ჩვენ მხარს ვუჭერთ გამოხატვის თავისუფლებას. მაგრამ ჩვენ ასევე თავისუფლად შეგვიძლია დავიჭიროთ მტკიცე პოზიცია ასეთი განცხადებების წინააღმდეგ. ამიტომ რუსეთის მუდმივი წარმომადგენელი მიხეილ ულიანოვი საგარეო საქმეთა სამინისტროში კვირას დაიბარეს", — ვკითხულობთ განცხადებაში.