კოლორადოს მთავრობის გადაწყვეტილებით, ქალის ტამპონები, ჰიგიენური საფენები და ბავშვის საფენები ადგილობრივ ბაზარზე გაიაფდება. ამის მიზეზი ის არის, რომ ჩამოთვლილ პროდუქტებზე ბრუნვის გადასახადი გაუქმდება, რაც მათ ფასზეც აისახება.

"ამიერიდან კოლორადოში ქალის ჰიგიენურ საშუალებებსა და ბავშვის საფენებზე ბრუნვის გადასახადი უქმდება. ახალი კანონის მეშვეობით, მოქალაქეები ამ საჭირო პროდუქტების ყიდვისას ფული დაზოგვას შეძლებენ", — ვკითხულობთ კოლორადოს მთავრობის გადაწყვეტილებაში.

აღნიშნულ გადაწყვეტილებას კოლორადოს ქალთა უფლებების დამცველი ფონდის აღმასრულებელი დირექტორიც გამოეხმაურა."ღირსეულ ცხოვრებას ყოველი კოლორადოელი იმსახურებს. სხვადასხვა აუცილებელი პროდუქტი, როგორიცაა საფენები და ტამპონები, ბევრისთვის არ არის ხელმისაწვდომი. ახალი გადაწყვეტილებით, ქალებს საშუალება ექნებათ, აუცილებელი ჰიგიენური საშუალებები უფრო ხელმისაწვდომ ფასად შეიძინონ, სამსახურში წავიდნენ, ბავშვებზე იზრუნონ და ოჯახისთვის ფულიც დაზოგონ", — განაცხადა ფონდის აღმასრულებელმა დირექტორმა.

კოლორადოს ახალი კანონი იმ ცვლილებებს უკავშირდება, რომელთა მიზანიც შტატის მაცხოვრებლებისთვის სხვადასხვა პროდუქტის გაიაფებაა. მთავრობის განცხადებით, სხვადასხვა პროდუქტზე ფასის შემცირების მიზნით, ჯამში 100 სხვადასხვა ღონისძიება იგეგმება და ჰიგიენურ საშუალებებზე ბრუნვის გადასახადის გაუქმება ერთ-ერთი იყო.