წარმოშობით ინდოელ ინგლისურენოვან მწერალ სალმან რუშდის ნიუ-იორკის შტატში თავს დაესხნენ. როგორც გამოცემა Associated Press წერს, მათი რეპორტიორი შეესწრო შემთხვევას, როგორ გაუსწორდა უცნობი კაცი ბუკერის პრემიის ლაურეატს ფიზიკურად, როცა ეს უკანასკნელი ღონისძიების სცენაზე სიტყვით გამოსასვლელად ემზადებოდა. პოლიციის განცხადებით, ავტორს ყელის არეში ჭრილობა აქვს მიყენებული.

გავრცელებულ ფოტოში ჩანს, რომ რუშდი თავდასხმის შედეგად ან დაეცა, ან შემდეგ დააწვინეს. როგორც ცნობილია, თავდამსხმელი უკვე დაკავებულია. ამ დროისთვის უცნობია, რა მდგომარეობაშია თავად მწერალი. იგი ვერტმფრენის დახმარებით ადგილობრივ საავადმყოფოში გადაიყვანეს.

ავტორი, რომლის მიმართაც არაერთხელ გაჟღერებულა სიკვდილის მუქარა, ნიუ-იორკის შტატში საჯარო ლექციის წასაკითხად იმყოფებოდა.

ფოტო: AP Photo / Joshua Goodman

სალმან რუშდი თანამედროვეობის ერთ-ერთი ყველაზე გავლენიანი ავტორია, რომლის წიგნმაც ეშმაკეული აიები 1980-იანები წლების შემდეგ არაერთგვაროვანი გამოხმაურება გამოიწვია. მუსლიმთა ნაწილმა ირანში წიგნი მკრეხელობად მიიჩნია, რის შემდეგაც, 1988 წელს, ეშმაკეული აიები ქვეყანაში აიკრძალა. მომდევნო წელს ირანის ლიდერმა აიათოლა რუჰოლა ხომეინიმ ედიქტით მიმდევრებს რუშდის მოკვლისკენ მოუწოდა. მწერლის მკვლელობისთვის ჯილდოდ $3 მილიონიც დაწესდა.

მართალია, ირანის მთავრობა მოგვიანებით გაემიჯნა ხომეინის განკარგულებას, თუმცა, რუშდისადმი მტრული განწყობა ქვეყანაში მაინც შენარჩუნდა. 2012 წელს ნახევრადოფიციალურმა რელიგიურმა ორგანიზაციამ ირანში რუშდის მოკვლის "გასამრჯელოდ" $2,8 მილიონიდან $3,3 მილიონამდე შეაგროვა.