შავი პანთერა ბრუნდება — თუმცა ამჯერად ჩედვიკ ბოუზმენის გარეშე. ცოტა ხნის წინ ვაკანდას სამყაროს ახალი ფილმის, Black Panther: Wakanda Forever-ის პირველი ტრეილერი გავრცელდა, რომელშიც ჩვენს საყვარელ გმირებთან ერთად ახალ პერსონაჟებსაც ვხედავთ.

"ვაკანდელები თავიანთი ისტორიის ახალ თავზე გადადიან. გმირებმა ნაკიასთან (ლუპიტა ნიონგო) და ევერეტ როსთან (მარტინ ფრიმენი) ერთად ვაკანდას სამეფოსთვის ახალი გზა უნდა შექმნან", — ვკითხულობთ ფილმის ოფიციალურ აღწერაში.

ფილმის აღწერის მიხედვით, პერსონაჟები ჩედვიკ ბოუზმენის პერსონაჟის გარდაცვალების შემდეგ ვაკანდას წინაშე არსებულ გამოწვევებს უნდა გაუმკლავდნენ. ტრეილერში ჩედვიკისა და მისი პერსონაჟის ხსოვნის საპატივცემულოდ შექმნილ მიურალსაც ვხედავთ.

"მე მსოფლიოში ყველაზე ძლევამოსილი ერის დედოფალი ვარ და ჩემი ოჯახი აღარ მყავს", — ამბობს ტრეილერში ანჯელა ბასეტის პერსონაჟი.

ტრეილერში შავ პანთერასაც ვხედავთ, თუმცა არ ჩანს, ვინ მოირგო გმირის კოსტიუმი. შესაძლოა, ამის გასაგებად ფილმის გამოსვლამდე მოცდა მოგვიწიოს. ფილმის პრემიერა 11 ნოემბერსაა დაგეგმილი.

შეგახსენებთ, რომ ჩედვიკ ბოუზმენი 2020 წელს ნაწლავის კიბოს დიაგნოზით გარდაიცვალა. მისი გარდაცვალება შოკისმომგვრელი იყო გულშემატკივრებისთვის, რადგან ჩედვიკს დიაგნოზი საზოგადოებისთვის არ გაუმხელია.

ამ ტრაგედიამ მარველის ყველა ფანი დაამწუხრა. ამასთანავე, ყველას გაუჩნდა კითხვა, თუ რა ბედი ეწეოდა შავ პანთერას. მარველმა გადაწყვიტა, ჩედვიკის პერსონაჟი სხვა მსახიობით არ ჩაენაცვლებინა და მისი ხსოვნისთვის პატივი ასე მიეგო. ფანების პეტიციის მიუხედავად, რომლითაც ჩედვიკის პერსონაჟის ისტორიის გაგრძელებას ითხოვდნენ, მარველს გადაწყვეტილება არ შეუცვლია.