საქართველოს საპარლამენტო უმრავლესობის ლიდერი მამუკა მდინარაძე On.ge-სთან საუბარში ამბობს, რომ კონსტიტუციის 94-ე მუხლის, თავისუფლების აქტის გაუქმება გადაწყვეტილი არ არის. მისივე თქმით, 94-ე მუხლს ჰყავს მოწინააღმდეგეებიც და მომხრეებიც და ორივე მხარეს მყარი არგუმენტები აქვთ:

"ჩვენ ვთქვით, რომ, რადგან იყო საუბარი თითქმის ყველა შეხვედრაზე 94-ე მუხლთან დაკავშირებით, ჩვენ დავრწმუნდით, რომ ამ მუხლთან დაკავშირებით მსჯელობა უნდა გაგრძლედეს. ეს არის და ეს."

მდინარაძის თქმით, თავისუფლების აქტი არ არის ერთადერთი, რომელთან დაკავშირებითაც მსჯელობა გაგრძელდება.

"ჩვენ წინ გვაქვს ვენეციის კომისიის დასკვნა და ამ დასკვნასაც ყურადღებით გავეცნობით. საბოლოო ჯამში პლენარულ სხდომებზე, პარლამენტის შიგნით გაგრძელდება მსგავსი მსჯელობები," - უთხრა On.ge-ს მამუკა მდინარაძემ.

კონსტიცუსიის 94-ე მუხლის გაუქმების ინიცატივით გია ჟორჟოლიანი და სოციალ-დემოკრატიული პარტია გამოვიდა. ისინი ითხოვდნენ საკონსტიტუციო ჩანაწერის ამოღებას, რომელიც ახალი გადასახადის დაწესებას, ან გადასახადის გაზრდას მხოლოდ რეფერენდუმის მეშვეობით ხდის შესაძლებელს. ინიციატივას ბევრი მომხრე ჰყავდა საკონსტიტუციო კომისიაშიც, თუმცა პროექტის საბოლოო ვერსიაში მუხლი შენარჩუნდა.