უკრაინის პრეზიდენტის განცხადებით, 28 თანამდებობის პირის გათავისუფლების საკითხი წყდება.

რატომ არის მნიშვნელოვანი: გუშინ, 17 ივნისს ცნობილი გახდა, რომ ზელენსკიმ გენერალური პროკურორი და უსაფრთხოების სამსახურის უფროსი გაათავისუფლა.

  • მოგვიანებით პრეზიდენტის ადმინისტრაციის ხელმძღვანელის მოადგილემ, ანდრიი სმირნოვმ აღნიშნა, რომ ივან ბაკანოვსა და ირინა ვენედიქტოვას უფლებამოსილება დროებით შეუჩერდათ.
  • მისი თქმით, უწყებებში შემოწმება ტარდება და მოვალეობის შესრულებისგან იმიტომ მოხსნეს, რომ გამოძიებაზე გავლენა არ ჰქონოდათ.

დეტალები: უკრაინის უსაფრთხოების სამსახურში საკადრო აუდიტის შესახებ ზელენსკიმ საღამოს ყოველდღიურ ვიდეომიმართვაში ისაუბრა.

  • "განსხვავებული დონე, სხვადასხვა მიმართულება. მაგრამ მიზეზები მსგავსია - მუშაობის არადამაკმაყოფილებელი შედეგები".

უკრაინსკა პრავდა წერს, რომ ზელენსკიმ უკრაინის უშიშროების სამსახურის უფროსის თანამდებობიდან ივან ბაკანოვის გადაყენების შუამდგომლობით უმაღლეს რადას უკვე მიმართა.

  • მათივე ინფორმაციით, ბაკანოვის გათავისუფლების საკითხი დღის წესრიგში მომდევნო პლენარულ სხდომაზე პირველი საკითხი იქნება.

რაც შეეხება გენერალურ პროკურატურას, უკრაინული მედია წერს, რომ შესაძლოა, ვენედიქტოვას გათავისუფლებაც განიხილონ სხდომაზე, თუმცა მის შესახებ განცხადება გამოქვეყნებული არ არის.

  • ვენედიქტოვა უკვე გამოეხმაურა მოვალეობის შეჩერებას და აღნიშნა, რომ გათავისუფლების საკითხი ჯერ არავისთან განუხილავს და კომენტარისგან თავს იკავებს.
  • "არ შემიძლია და არც ვაპირებ პრეზიდენტის გადაწყვეტილებასთან კამათს".