მიხეილ გოგინაშვილმა პარტიის და საკრებულოს დატოვების შესახებ განცხადება იმის ახსნით დაიწყო, რატომ მიიღო ეს გადაწყვეტილება. მისი თქმით, ძალიან რთულია ნაწილ-ნაწილ ილაპარაკოს ხალხში და გაზომოს "რამდენის თქმაა საჭირო და რამდენის არა".

რატომ არის მნიშვნელოვანი: ბოლო პერიოდში, აშშ-ის ელჩი როგორც მმართველი პარტიიდან წასულების, ასევე, მოქმედი დეპუტატების კრიტიკის ობიექტი გახდა.

  • 8 ივლისს ყაველაშვილმა დეგნანს წერილი მისწერა და ჰკითხა, რატომ არ ემიჯნება "პროვოკაციებს".
  • პასუხად, დეგნანმა წერილს ტყუილებითა და კონსპირაციული თეორიებით სავსე უწოდა და აღნიშნა, რომ ბოლომდე ვერ წაიკითხა.
  • დღეს თანამდებობები, ლაგოდეხის, თერჯოლის, ახალციხის და ჭიათურის საკრებულოების წევრებმა დატოვეს.

რას წერს გოგინაშვილი: საკრებულოს წევრი უკვე წასული თანაპარტიელების მსგავსად საქართველოში აშშ-ის ელჩს, კელი დეგნანს მიხეილ ყაველაშვილის წერილზე გაკეთებული განცხადებების გამო აკრიტიკებს.

  • "მაშინ, როდესაც მიხეილ ყაველაშვილის მიერ დასმულ კითხვებზე, რომელიც დარწმუნებული ვარ ქართველი ხალხის დიდ ნაწილს გააჩნია, უახლოესი პარტნიორი ქვეყნის ელჩის მხრიდან ასეთი მძიმე შეფასებები მოვისმინეთ, ნაცვლად იმისა, რომ ჩვენ მოგვესმინა კითხვებზე პასუხები, ვნახეთ შეურაცხყოფა და უპატივისმცემლობა".
  • ქართველმა ხალხმა (განსაკუთრებით გორელებმა) კარგად იცის როგორია ომის ფასი, რომლისკენაც სურთ რადიკალურ ძალებს უბიძგონ ჩვენ ქვეყანს".
  • იმის ნაცვლად, რომ ამერიკის ელჩი ემიჯნებოდეს მათ და ყველა მსგავს ძალას და მცდელობას, სამწუხაროდ, ვნახეთ საპირისპირო".
  • სწორედ ამიტომ, ვუერთდები ჩემი კოლეგის მოწოდებას, ვტოვებ პარტია ქართულ ოცნებას და ფრაქციის თავმდჯომარის მოადგილის თანამდებობას იმისთვის, რომ უფრო თავისუფლად შევძლო ამ ყველაფერზე საუბარი და ჩემს თანამოაზრეებთან ერთად არავის მივცე საშუალება კიდევ ერთხელ გახვიონ ჩვენი ქვეყანა ომის ქარცეცხლში".