ქართული ოცნების ყოფილმა დეპუტატმა და საკონსტიტუციო სასამართლოს მოსამართლემ ეს ინფორმაცია ფორმულას დაუდასტურა. მისი თქმით, საგამოძიებო სამსახურებს თავისი ინიციატივით მიმართა და პროკურატურაში უკვე დაკითხეს.

რატომ არის მნიშვნელოვანი: 13 სექტემბერს ერთ-ერთი ღია წყაროზე აიტვირთა სასულიერო პირებთან, ჟურნალისტებთან აქტივისტებთან, დიპლომატებთან და სხვა პირებთან დაკავშირებით მასალები, რომელმაც სავარაუდოდ, სახელმწიფო უსაფრთხოების სამსახურიდან გაჟონა.

  • ჩანაწერების მიხედვით, პროტოპრესვიტერმა გიორგი ზვიადაძემ მანანა კობახიძეს აიისას საქმის დეტალებზე სასაუბროდ დაურეკა და აცნობა, რომ საპატრიარქო საქმეზე მიმდინარე სასამართლო პროცესს თვალს ადევნებს;
  • კობახიძემ, რომელიც აიისას საქმეზე მუშაობდა, ზვიადაძეს აცნობა, რომ ეკლესიის პოზიციას იზიარებს.

დეტალები: ჟურნალისტის კითხვაზე, ადასტურებს თუ არა ჩანაწერების ნამდვილობას, მათ შორის, ზვიადაძესთან, კობახიძის პასუხი ასეთია:

  • "მამა გიორგი ზვიადაძესთან მე კონტაქტი მქონია, ამ პიროვნებას ვიცნობ. ასეთი შინაარსის შემცველი საუბრის რეალობას მე არ ვადასტურებ და ავთენტურობას ამ ტექსტისა მე არ ვადასტურებ".
  • "კომუნიკაციის არსებობის ფაქტმა მე გამიჩინა ეჭვი, რომ შესაძლებელია ვინმე ამ საუბარს ისმენდა. აქედან გამომდინარე, ცხადია, მე მქონდა ლეგიტიმური ინტერესი, რომ ეს საკითხები გამორკვეულიყო".

არქივიდან: ფაილების გავრცელების შემდეგ, საქართველოს დემოკრატიულმა ინიციატივამ (GDI) საქართველოს საკონსტიტუციო სასამართლოს შუამდგომლობით მიმართა და აიისას საქმეზე კობახიძის აცილება მოითხოვა.

  • მოგვიანებით GDI-მ გაავრცელა ინფორმაცია, რომ საკონსტიტუციო სასამართლომ არ დააკმაყოფილა მათი შუამდგომლობა კობახიძის მიმართ დისციპლინური წარმოების დაწყებაზე;
  • 2 დეკემბერს კობახიძე დააწინაურეს — ის საკონსტიტუციო სასამართლოს თავმჯდომარის მოადგილე და მეორე კოლეგიის თავმჯდომარე გახდა.

ე.წ. კრებსების ავთენტურობა ოფიციალურად დადასტურებული არ არის, თუმცა არაერთმა ადამიანმა ჩანაწერებში საკუთარი საუბრები ამოიცნო.

  • ჩანაწერების თანახმად, შესაბამისი სამსახურები სწავლობენ სასულიერო პირების (და არამარტო) კავშირებს, უსმენენ სატელეფონო საუბრებს, კითხულობენ მესიჯებს და აგროვებენ "კომპრომატებს" პირადი ცხოვრების შესახებაც.