გაფრთხილება: სტატია Stranger Things-ის შესახებ სპოილერებს შეიცავს.

Stranger Things-ის მე-4 სეზონის მეორე ნაწილის პრემიერა პირველ ივლისსაა დაგეგმილი. მანამდე კი ფანები სერიალში გაფანტულ ფაქტებს ერთმანეთთან აკავშირებენ და სხვადასხვა, ერთმანეთზე უფრო საინტერესო თუ დამაფიქრებელ თეორიებს ქმნიან.

ამ სტატიაში ფანების 8 თეორიას წარმოგიდგენთ, რომელიც გასულ სეზონებს სხვა თვალით დაგანახებს და ახალ ეპიზოდებზე დაგაფიქრებს:

1. პირველ სეზონში უილი მეორე სამყაროში ვეკნამ წაიყვანა

ფანების დიდი ნაწილი დარწმუნებულია, რომ უილის მეორე სამყაროში წაყვანის ძალა უბრალო დემაგორგონს არ ჰქონდა და ის ვეკნამ წაიყვანა. ამის მიზეზი კი ვეკნასა და უილს შორის მსგავსებაა: პირველ სეზონში ჯოისი უილზე ამბობს, რომ ის სხვა ბავშვებს არ ჰგავს და მგრძნობიარეა. მეოთხე სეზონში იმავეს ამბობს ვეკნაზე მამამისი მაშინ, როცა ვეკნა ჯერ კიდევ ბავშვი იყო. ამასთანავე, არსებობს მოსაზრება, რომ ვეკნას უნდოდა, უილისგან თავისნაირი ბოროტმოქმედი შეექმნა.

2. უილი ბოროტმოქმედია

ზოგიერთი ფანი ფიქრობს, რომ ამდენი ხნის განმავლობაში მეორე სამყაროში გადარჩენა უილმა შემთხვევით არ შეძლო და ის სინამდვილეში ბოროტმოქმედია. ფანები თვლიან, რომ ვეკნამ მას სიცოცხლე სპეციალურად შეუნარჩუნა.

3. უილი მოკვდება

მეორე სამყაროსთან კონტაქტი, ნახატი, რომელსაც არავის აჩვენებს — ფანები თვლიან, რომ მიუხედავად იმისა, არის თუ არა უილი ბოროტმოქმედი, ის ამ სეზონში მოკვდება. ზოგი იმასაც თვლის, რომ სიკვდილამდე უილი მაიკს თავის რომანტიკულ გრძნობებს გაუმხელს.

უილი გეია? — Stranger Things-ის პროდიუსერი ამ თეორიას გამოეხმაურა

4. სკოლის ფსიქოლოგი ვეკნას დამხმარეა

სკოლის ფსიქოლოგს სერიალში საათიანი ყელსაბამი უკეთია — ვეკნას ყველა მსხვერპლი სიკვდილამდე საათს ხედავდა. აღსანიშნავია, რომ მეოთხე სეზონის პირველ ნაწილში დაღუპული ბავშვები სკოლის ფსიქოლოგთან დადიოდნენ.

5. ედი 010-ია

ბევრი თვლის, რომ ლაბორატორიაში მოკლულ ბავშვებს შორის 010 არ იყო და ის სინამდვილეში ედია. ფანების აზრით, მეოთხე სეზონში 010-სა და ედის პერსონაჟს საკმაო დრო ეთმობათ, ამასთანავე, როცა ედი ცდილობს, კრისის საკუთარი თავი გაახსენოს, ეუბნება, რომ ბავშვობაში მოკლე თმა ჰქონდა.

6. ედი ნენსის გადაარჩენს

მეოთხე სეზონის მეორე ნაწილის ტრეილერში ედი გიტარაზე უკრავს. ფანები თვლიან, რომ ედი ნენსის საყვარელ სიმღერას ასრულებს, რათა ის ვეკნასგან იხსნას.

7. ნენსის საყვარელ სიმღერას რობინი გადაარჩენს

მეოთხე სეზონში რობინი და ნენსი უფრო დაახლოვდნენ. ნენსის ოთახის თვალიერებისას რობინმა კასეტები იპოვა, ამიტომ, სავარაუდოდ, ნენსის საყვარელი სიმღერაც ეცოდინება.

8. სერიალის ერთ-ერთი მთავარი პერსონაჟი მოკვდება

მეოთხე სეზონის მეორე ნაწილის ძალიან დაძაბული ტრეილერის ნახვის შემდეგ, ფანები დარწმუნებულები არიან, რომ ერთ-ერთი მთავარი პერსონაჟი დაგვტოვებს. ბევრი ღელავს, რომ ვეკნა მაქსს მაინც მისწვდება, ამასთან, თითქმის ყველას ეშინია იმის წარმოდგენის, რომ შესაძლოა სერიალის ფავორიტი პერსონაჟი — სტივი მოკვდეს.

ამავე თემაზე:

• ფინალური ბრძოლა იწყება — ნახეთ Stranger Things 4-ის ახალი სერიების ტრეილერი
• Stranger Things-ის 10 კადრს მიღმა ფოტო, რომელიც მე-4 სეზონს სხვა თვალით დაგანახებს
• ტესტი: Stranger Things-ის რომელი პერსონაჟი ხარ?
• როგორ იცვლებოდნენ Stranger Things-ის პერსონაჟები ყოველ სეზონში — ფოტოები