პროკურატურის განცხადებით, მათი თანამშრომლების მიმართ ცრუ ინფორმაციის გავრცელება პერიოდულ და კამპანიურ ხასიათს ატარებს.

რატომ არის მნიშვნელოვანი: ელენე ხოშტარიამ დაასახელა პროკურორები, ვის დასანქცირებასაც ითხოვს. მისი თქმით, მართლმსაჯულებისა და პროკურატურის სისტემაში ივანიშვილის "ოლიგარქიული საყრდენები" მუშაობენ, რომლებიც პოლიტიკურ დავალებებს ასრულებენ.

  • სიაშია: ყოფილი გენერალური პროკურორი ოთარ ფარცხალაძე, მოქმედი გენპროკურორი ირაკლი შოთაძე და პროკურორები — ჯარჯი წიკლაური, მიხეილ სადრაძე, ამირან გულუაშვილი, რევაზ ბაღაშვილი.

რას ამბობს პროკურატურა: უწყების განცხადებით, პარტიის მიზანი პროკურატურის დისკრედიტაცია და საზოგადოების შეცდომაში შეყვანაა.

  • "უნდა აღვნიშნოთ, რომ საქართველოს პროკურატურაზე ცილისმწამებლური თავდასხმა და ე.წ. შესაშინებელი სიების ყალბი ტირაჟირება არ არის ახალი".

ფარცხალაძესთან დაკავშირებით, უწყებაში ამბობს, რომ იგი 2013 წლის შემდგომ აღარ მუშაობს და არანაირი შემხებლობა არ აქვს და არც შეიძლება, ჰქონდეს საქართველოს პროკურატურასთან.

  • "თითოეული მსგავსი ყალბი ინფორმაციის გავრცელებას შესაბამისი პასუხი გაეცემა, მათ შორის, ცილისმწამებლური განცხადებების უარყოფის მოთხოვნით სამოქალაქო წესით სასამართლოსადმი მიმართვის გზით".

პროკურორებუ: წიკლაურმა ფორმულასთან თქვა, რომ ნებისმიერი პროკურორი კანონის მითითებებს, ასევე ხელმძღვანელის კანონიერ დავალებებს ასრულებს. მისი თქმით, ამ საკითხზე სერიოზული კომენტარის გაკეთება რთულია.

  • სადრაძის თქმით კი, ხოშტარიას ბრალდება პროკურორებზე "სამართლებრივ საფუძველს მოკლებულია".

არქივიდან: ხოშტარიამ უკვე მოითხოვა ევროპარლამენტის რეზოლუციის საბოლოოდ შესრულება და ბიძინა ივანიშვილისთვის სანქციების დაწესება.

  • მან დაასახელა ბიზნესმენებიც რომლებიც, მისი თქმით, ივანიშვილის ოლიგარქიული მმართველობის საყრდენები არიან და მოითხოვა 9 მოსამართლის სანქცირებაც.

  • ოპოზიცია სანქციების დაწესებაზე სამუშაოდ ვაშინგტონსა და ბრიუსელში გეგმავს ვიზიტს.