საქართველოს სახალხო დამცველი მიიჩნევს, რომ ამ დრომდე გადაუჭრელია ქუჩაში მცხოვრებ და მომუშავე არასრულწლოვანთა ძალადობისგან დაცვის საკითხი და ამ მიმართულებით სახელმწიფოს პასუხისმგებლობა კანონმდებლობაში არ ასახულა. ამ შეფასებით ეხმაურება უჩა ნანუაშვილი, დღეს, 1 ივნისს, ბავშვთა დაცვის მსოფლიო დღეს. ბავშვებთან დაკავშირებული პრობლემური საკითხები ასახულია სახალხო დამცველის 2015 წლის ანგარიშში.

ომბუდსმენის განცხადებით, კვლავ პრობლემად რჩება აღმზრდელების სისტემური გადამზადების, ბავშვის მიმართ ძალადობისა და ძალადობის მსხვერპლი ბავშვების რეაბილიტაციის საკითხები:

"მშობლების განქორწინების შემთხვევაში, ბავშვის საცხოვრებელი ადგილის განსაზღვრის შესახებ, სასამართლო გადაწყვეტილების აღსრულებისას არ ხდება ბავშვის აზრის გათვალისწინება. დასახვეწია არასრულწლოვანთა საზღვარზე გადაყვანის შესახებ არსებული კანონმდებლობა. ბავშვზე ზრუნვის სახელმწიფო პროგრამის ფარგლებში ფუნქციონირებადი დამხმარე ქვეპროგრამების ნაწილი სრულფასოვნად ვერ ფარავს არასრულწლოვნების საჭიროებებს. სოციალური სამსახური დღემდე არ არის აღჭურვილი საკმარისი ადამიანური და ტექნიკური რესურსით, მათ შორის სატრანსპორტო საშუალებებით. მწვავედ დგას ბავშვთა სიღარიბისა და სიკვდილიანობის პრობლემა".

ფოტო: სახალხო დამცველი

ომბუდსმენის მონაცემთა ცხრილში, რაოდენობრივი განაწილების დროს, გამოიკვეთა, რომ ბავშვთა სიღარიბე და ცხოვრების არასათანადო პირობები ისევ გამოწვევად რჩება.

ანგარიშში ყურადღება გამახვილებულია 5 წლამდე ბავშვთა სიკვდილიანობას და ამ მხრივ არსებულ ვითარებაზე. აღნიშნულ საკითხთან დაკავშირებით, სახალხო დამცველმა წინადადებით მიმართა საქართველოს მთავრობას. ომბუდსმენის რეკომენდაციით, აუცილებელია ჩვილ ბავშვთა სიკვდილიანობის პრევენცია, სპეციალური სტრატეგიისა და სამოქმედო გეგმის შემუშავებით.

ომბუდსმენის განცხადებით, სავალალოა მედია საშუალებებში არასრულწლოვანთა თემების გაშუქების ეთიკური და სამართლებრივი სტანდარტები:

ფოტო: სახალხო დამცველი

სახალხო დამცველი აცხადებს, რომ შედეგების მიხედვით, 2015 წლის განმავლობაში, მედიაში არასრულწლოვანთა სქესობრივი თავისუფლებისა და ხელშეუხებლობის წინააღმდეგ მიმართული ქმედებები, ხშირ შემთხვევაში, ეთიკური და სამართლებრივი სტანდარტების დარღვევებით შუქდებოდა:

"აღნიშნულ სფეროში განსაკუთრებით პრობლემური იყო დაზარალებული ბავშვებისა და მათი კანონიერი წარმომადგენლების, საცხოვრებელი ადგილის, სასწავლო დაწესებულებისა და საქმის ცალკეული დეტალების იდენტიფიცირება".

პრეზენტაციის დასასრულს საქართველოს სახალხო დამცველის აპარატსა და საქართველოში გაეროს ბავშვთა ფონდის წარმომადგენლობას შორის ურთიერთთანამშრომლობის მემორანდუმი გაფორმდა.