იურიდიულ საკითხთა კომიტეტის თავჯდომარე ეკა ბესელია პრეზიდენტის, გიორგი მარგველაშვილის მიერ გაკრიტიკებულ კონსტიტუციურ ცვლილებებს, კრიტიკითვე პასუხობს.

ეკა ბესელია გაუმართლებელს უწოდებს მარგველაშვილის შენიშვნას, რომ პრეზიდენტის პირდაპირი წესით არჩევის სისტემის ცვლილება პერსონალურად მის გამო მოხდა:

"არავის არ გვაქვს ჩვენ შინაგანად იმის ილუზია ან განცდა, რომ მოქმედი პრეზიდენტი პირდაპირი არჩევის პირობებში გამარჯვებას მოიპოვებდა".

ბესელიას მოსაზრებას იზიარებს მისი პირველი მოადგილე ვანო ზარდიაშვილიც.

"ათი კანდიდატი რომ იღებდეს მონაწილეობას არჩევნებში, მარგველაშვილი მეათე ადგილზე გავიდოდა" - ამბობს ის რუსთავი 2-თან საუბრისას და დასძენს, რომ მარგველაშვილი სააკაშვილის მიერ დატოვებულ კონსტიტუციას "ებღაუჭება".

ქართული ოცნების მიერ შემოთავაზებული საკონსტიტუციო რეფორმის მიხედვით, პრეზიდენტის პირდაპირი არჩევის წესი უქმდება და მას 300 ხმოსანი აირჩევს.