მმართველ გუნდში ბრიფინგი გაიმართა, რომელზეც კობახიძემ ევროკომისიის დასკვნა შეაფასა.

რატომ არის მნიშვნელოვანი: ასოცირებული ტრიოს ქვეყნებს შორის, საქართველო ერთადერთია, რომელმაც ევროკავშირის კანდიდატის წევრობის სტატუსის მიღებაზე ევროკომისიისგან რეკომენდაცია ვერ მიიღო.

  • ევროპარლამენტის კრიტიკული რეზოლუციის შემდეგ, ევროკომისიის მსგავსი რეკომენდაცია აძლიერებს განცდას, რომ საქართველომ შესაძლოა, ვერ მიიღოს კანდიდატის სტატუსი.

ირაკლი კობახიძემ ევროკომისის დასკვნა "ახსნა" იმით, რომ ისინი არა ექსპერტულ, არამედ პოლიტიკურ გადაწყვეტილებას იღებენ. ასევე, ჩამოთვალა პარამეტრები, რომელშიც, მისი აზრით, საქართველო უკრაინასა და მოლდოვას "წინ უსწრებს".

  • "იქნება ეს დემოკრატია, სამართლის უზენაესობა, ადამიანის უფლებების დაცვა და კორუფციასთან ბრძოლა, EU-სთან სავაჭრო ეკონომიკური თანამშრომლობა, თუ ასოცირების შეთანხმებით გათვალისწინებული ვალდებულებების საერთო შესრულება".

როგორია ევროკომისიის დასკვნა საქართველოზე: ურსულა ფონ დერ ლაიენის განცხადებით, საქართველო იზიარებს იმავე მისწრაფებასა და პოტენციალს, რასაც მოლდოვა-უკრაინა და მის აპლიკაციას აქვს ძალა.

  • თუმცა ევროკომისიის პრეზიდენტის თქმით, იმისთვის, რომ საქართველომ წარმატებას მიაღწიოს, ქვეყანა პოლიტიკურად უნდა გაერთიანდეს, შეიმუშაოს მკაფიო გზა სტრუქტურული რეფორმებისთვის.
  • "ამიტომ ჩვენ გავცემთ რეკომენდაციას, რომ მიეცეს ევროპული პერსპექტივა, მაგრამ დავბრუნდეთ, რათა შევაფასოთ, კანდიდატის სტატუსის მინიჭებამდე რამდენად აკმაყოფილებს მთელ რიგ პირობებს".