შინაგან საქმეთა სამინისტრო მარნეული-ბოლნისის გზაზე ავტოსაგზაო შემთხვევის შემდეგ მომხდარი დაპირისპირების შესახებ კიდევ ერთ განცხადებას ავრცელებს.

განცხადებაში ვკითხულობთ, რომ ადგილზე დაპირისპირება მოხდა როგორც შეკრებილ მოქალაქეებს, ისევე, მოქალაქეებსა და ადგილობრივი წესრიგის დაცვის მიზნით ადგილზე მყოფ სამართალდამცავებს შორის.

ამასთან, შსს-ს მიერ გავრცელებულ განცხადებაში ვკითხულობთ, რომ სიტუაციის დეესკალაციის მიზნით, შემთხვევის ადგილზე გამოცხადდნენ შსს-ს სხვა დანაყოფების წარმომადგენლები, მათ შორის საპატრულო, კრიმინალური და განსაკუთრებულ დავალებათა დეპარტამენტების თანამშრომლები.

"გვსურს საზოგადოებას მივაწოდოთ დამატებითი ინფორმაცია, ბოლნისის მუნიციპალიტეტის სოფელ ნახიდურში განვითარებულ მოვლენებთან დაკავშირებით.

მას შემდეგ, რაც ცენტრალურ საავტომობილო გზაზე მოხდა ავტოსაგზაო შემთხვევა, რომლის შედეგად 2 არასრულწლოვანი გარდაიცვალა, ადგილზე ადგილობრივი მოსახლეობა შეიკრიბა და ვითარება დაიძაბა.

დაპირისპირება მოხდა როგორც ადგილზე შეკრებილ მოქალაქეებს, ასევე, მოქალაქეებსა და საზოგადოებრივი წესრიგის დაცვის მიზნით ადგილზე მყოფ სამართალდამცველებს შორის.
შეკრებილებმა გადააბრუნეს როგორც შეჯახებაში მონაწილე ავტოსატრანსპორტო საშუალება, ასევე, სასწრაფო - სამედიცინო დახმარების ბრიგადის ავტომობილი.

ასევე, მათ დააზიანეს და ფანჯრები ჩაუმსხვრიეს ადგილზე მყოფი სხვა მოქალაქეების ავტომობილებს.

შეკრებილი პირები, ავტოსაგზაო შემთხვევაში მონაწილე სატრანსპორტო საშუალების მგზავრებს გადაადგილების შესაძლებლობას არ აძლევდნენ, ასევე, სამართალდამცველებს საგამოძიებო მოქმედებების ჩატარებაში უშლიდნენ ხელს, ამასთან, სასწრაფო სამედიცინო დახმარების ექიმებს მუშაობის საშუალებას არ აძლევდნენ.

სიტუაციის დეესკალაციის მიზნით, შემთხვევის ადგილზე მყისიერად გამოცხადდნენ შინაგან საქმეთა სამინისტროს სხვადასხვა დანაყოფის წარმომადგენლები, მათ შორის საპატრულო, კრიმინალური და განსაკუთრებულ დავალებათა დეპარტამენტების თანამშრომლები.

დაპირისპირების შედეგად, სხვადასხვა სახის დაზიანება მიიღო შინაგან საქმეთა სამინისტროს რამდენიმე თანამშრომელმა და დაშავდა 8 მოქალაქე, რომლებსაც შესაბამისი სამედიცინო დახმარება გაეწიათ. ნაწილი მათგანი ამ დრომდე რჩება სამედიცინო დაწესებულებებში", — წერია შსს-ს განცხადებაში.

ცნობისთვის, გუშინ, 30 დეკემბრის საღამოს, სოფელ ნახიდურთან ორ არასრულწლოვანს ავტომობილი დაეჯახა, ერთ-ერთი მათგანი ადგილზე გარდაიცვალა, ხოლო მეორე კლინიკაში მიყვანიდან მალევე.

გავრცელებული ინფორმაციით, ადგილზე მისულმა სასწრაფო დახმარების ბრიგადამ პირველადი დახმარების გაწევა ავტოსაგზაო შემთხვევაში მონაწილე მძღოლს დაუწყო, რამაც მოსახლეობის გაღიზიანება გამოიწვია და ადგილობრივებმა სასწრაფოს მანქანა ამოაყირავეს.

აღნიშნული დაპირისპირების შედეგად ცხრა დაშავებული პირი ბოლნისის საავადმყოფოში გადაიყვანეს.

შემთხვევის ადგილიდან გავრცელებულ კადრებში ჩანს,რომ ადგილზე დიდი რაოდენობით სამართალდამცველები არიან მობილიზებული, მათ შორის არიან ძალოვანი უწყებების წარმომადგენლები ნიღბებში.

შინაგან საქმეთა სამინისტრომ აღნიშნულ შემთხვევაზე განცხადება გაავრცელა, რომელშიც წერია, რომ ავტოსაგზაო შემთხვევაში მონაწილეო მძღოლი 2003 წელს დაბადებული თ.ჩ. დააკავა.

გამოძიება სისხლის სამართლის კოდექსის 276-ე მუხლით მიმდინარეობს