"პირველივე დღეს რეპრესიული კანონების მიღება არის მიუღებელი", — ამის შესახებ საქართველოს მე-5 პრეზიდენტმა, სალომე ზურაბიშვილმა ტვ პირველის ეთერში თქვა.

რაც შეეხება სალომე ზურაბიშვილისთვის პირადი დაცვის მოხსნას, ის ამბობს, რომ იცოდა, რომ "ამ კანონს მიიღებდნენ და ყველაფერს ელოდება". ზურაბიშვილმა ისიც თქვა, რომ ახალ ოფისში ახალი წლის მერე გადავა, მანამდე "ყველაფერს გადაიტანენ და მოაგვარებენ".

შეგახსენებთ, რომ "ოცნების" მიერ არჩეულმა პრეზიდენტმა მიხეილ ყაველაშვილმა ხელი მოაწერა "სახელმწიფო დაცვის სპეციალური სამსახურის შესახებ“ კანონში ცვლილებას, რის შემდეგაც დაცვა მოეხსნება პრეზიდენტს, პრემიერ-მინისტრსა თუ პარლამენტის თავმჯდომარეს, რომელიც დაარღვევს კონსტიტუციას და ამას საკონსტიტუციო სასამართლო დაადასტურებს. 2023 წელს, "ქართულმა ოცნებამ", უნებართვო ვიზიტების საკითხზე სალომე ზურაბიშვილს საკონსტიტუციო სასამართლოში დავა მოუგო.