პიქსარისა და დისნეის ანიმაციურ ფილმში Lightyear გეი კოცნის სცენამ ცოტა ხნის წინ დიდი განხილვა გამოიწვია — განსაკუთრებით, მას შემდეგ, რაც სწორედ ამ ეპიზოდის გამო ნამუშევარი რამდენიმე ქვეყანაში აკრძალეს.

ცნობილი გახდა, რომ ფილმიდან ლესბოსელი წყვილის — მეთაურ ალიშა ჰოუთორნისა და მისი ცოლის — კოცნის სცენა თავდაპირველად ამოჭრეს, თუმცა, ღია პროტესტის გამო, მათ შორის, პიქსარის მხრიდან, ანიმაციის შემქმნელებს ეპიზოდის დაბრუნება მოუხდათ.

ამ გადაწყვეტილებით კმაყოფილი დარჩა ფილმში მონაწილე კრის ევანსიც, რომელიც ერთ-ერთ მთავარ გმირს, ბაზს, ახმოვანებს. თუმცა, ევანსის თქმით, საწყენია, რომ სცენა განხილვის თემად იქცა.

"კარგი და შესანიშნავია ამბავია, ძალიან მახარებს", — ამბობს ევანსი განხილვადი სცენის ფილმში დაბრუნებაზე Variety-სთან ინტერვიუში, — "თუმცა, რთულია, ცოტათი მაინც არ განაწყენდე, რომ ეს საერთოდ განხილვის თემად იქცა".

მსახიობს იმედი აქვს, რომ სამომავლოდ ამგვარი ამბავი "ნიუსად" არც კი განიხილება.

"მიზანი ხომ ისაა, რომ ეს ნორმალური იყოს და ფეხდაუდგმელ მიწად არ მიიჩნეოდეს — რომ ეს, უბრალოდ, ისაა, რაც არის", — ამატებს ევანსი.

ჰოლივუდის ვარსკვლავის თქმით მოხარულია, ამ მნიშვნელოვანი ნაბიჯების გადადგმაში რომ მონაწილეობს, თუმცა, "გამაოგნებელია, რამდენი ხანი დაგვჭირდა ამისთვის".

რაც შეეხება Lightyear-ს, ანიმაციას მაყურებელი კინოთეატრებში 17 ივნისიდან იხილავს.