ევროპარლამენტარი მარინა კალიურანდი აცხადებს, რომ ქართველმა პოლიტიკოსებმა დღევანდელი დისკუსია უნდა აღიქვან, როგორც ბოლო გამოღვიძების ზარი.

"მე მოვუწოდე ქართველ პოლიტიკოსებს მმართველი პარტიიდან, რა თქმა უნდა, თუმცა ასევე, ოპოზიციიდანაც, რომ მიიღონ დღევანდელი დისკუსია, როგორც ბოლო გამოსაღვიძებელი ზარი. მათ გვერდით უნდა გადადონ თავიანთი პარტიების ინტერესები, შეწყვიტონ ერთმანეთზე დაბრალება და დაიწყონ ერთად მუშაობა ძალიან საჭირო დემოკრატიულ რეფორმებზე", — წერს კალიურანდი.

ევროპარლამენტმა საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუცია მიიღო, რომელსაც მხარი 308 დეპუტატმა დაუჭირა. წინააღმდეგი 218 იყო.

გუშინ, 8 ივნისს ევროპარლამენტში ამ საკითხზე დებატები გაიმართა. ევროპარლამენტარებმა საქართველოში მედიაგარემო კრიტიკულად შეაფასეს და შეშფოთება გამოხატეს მთავრობის დამოკიდებულებებზე, რაც რეზოლუციაში დაწვრილებით აისახა.

ტექსტის ერთ-ერთი ყველაზე მნიშვნელოვანი პუნქტი ქართული ოცნების დამფუძნებლის, ბიძინა ივანიშვილისთვის სანქციების დაწესების მოწოდებას და მის კრემლთან ურთიერთობას ეხება. რეზოლუცია საქართველოს მთავრობას ზოგადი პრინციპებისა და მოვალეობების დაცვისკენ მოუწოდებს, ამასთანავე მასში განხილულია კონკრეტული საკითხები, რაზეც ხელისუფლებას შესაბამისი რეაგირება უნდა ჰქონდეს, როგორიცაა 5 ივლისის, ნიკა გვარამიას და მიხეილ სააკაშვილის საქმეები.