გაფრთხილება: სტატია Stranger Things-ის მეოთხე სეზონის შესახებ სპოილერებს შეიცავს.

ცოტა ხნის წინ ნეტფლიქსის ერთ-ერთი ყველაზე პოპულარული სერიალის, Stranger Things-ის მეოთხე სეზონის პირველი ნაწილის პრემიერა შედგა. ახალი თავგადასავლებით, პერსონაჟებითა და ბოროტმოქმედით გამორჩეულ სეზონში ფანებმა ერთ-ერთ საუკეთესო სცენად მაქსისა და ვექნას დაპირისპირება აღიარეს.

სეზონის ყველაზე ემოციურ სცენაში მაქსი რეალობაში დაბრუნებას მეგობრების შესახებ საყვარელი მოგონებებისა და კეიტ ბუშის 1985 წლის ცნობილი სიმღერით, Running Up That Hill (A Deal With God)-ით ახერხებს.

აღნიშნული სცენის ნახვის შემდეგ სერიალის ფანებმა ხელახლა ან პირველად აღმოაჩინეს კეიტის სიმღერა. შედეგად, სიმღერა და მომღერალი ჩარტების სათავეში მოექცნენ. საზოგადოების აღფრთოვანებას კი თავად კეიტ ბუშიც გამოეხმაურა.

"ალბათ, უკვე იცით, რომ საოცარი და ჩამთრევი სერიალის, Stranger Things-ის პირველი ნაწილი ნეტფლიქსზე გამოვიდა. სერიალის ახალგაზრდა ფანებმა სიმღერა Running Up That Hill-ს ახალი სიცოცხლე აჩუქეს, რაც ძალიან მომწონს. ამის გამო Running Up That Hill ჩარტების სათავეშია და ბრიტანულ ჩარტებში მე-8 ადგილს იკავებს. აღფრთოვანებული ვარ. დიდი მადლობა სიმღერის მხარდაჭერისთვის. ივლისში სეზონის მეორე ნაწილს სუნთქვაშეკრული ველოდები", — წერს კეიტ ბუში.

აღსანიშნავია, რომ სერიალის წყალობით კეიტ ბუში ამერიკული ჩარტების ათეულში პირველად მოხვდა.

ამავე თემაზე: