რუსულმა ტელეკომპანია დოჟდმა ევროპული მაუწყებლობის ლიცენზია მიიღო. ამის შესახებ ფეისბუქგვერდზე არხის მთავარმა რედაქტორმა, ტიხონ ძიადკომ დაწერა.

"დოჟდმა ევროპული მაუწყებლობის ლიცენზია მიიღო. 9 ივნისს მაუწყებლობას ვერ დავიწყებთ, მაგრამ ეს მალე მოხდება, როცა მზად ვიქნებით. ბევრი გეგმა გვაქვს: ვგეგმავთ მაუწყებლობას სხვადასხვა სტუდიიდან — ლატვიაში, ჰოლანდიაში, საფრანგეთსა და საქართველოში. დავიწყებთ მცირედით და თანდათან გავაფართოვებთ საეთერო ბადეს. ჩვენც ძალიან მოგვენატრეთ და იმედია, თქვენც, ყველა დეტალი იქნება მალე", — წერს ის.

რუსეთში მაუწყებლობა დოჟდმა 3 მარტს შეწყვიტა. ამას წინ პირველ მარტს რუსეთის პროკურატურის მიერ კრიტიკული მედიების, დოჟდისა და ეხო მოსკვის ვებგვერდების დაბლოკვა უძღოდა. დეპარტამენტში განაცხადეს, რომ ისინი უკრაინასთან ომში რუსული არმიის ქმედებების შესახებ "ცრუ ინფორმაციებს" ავრცელებენ. უწყებამ მედიების ომზე გამოქვეყნებული მასალები ექსტრემისტულად მოიხსენია.

მოგვიანებით კი რუსეთში მიიღეს კანონი, რომლის მიხედვითაც, დააპატიმრებენ ყველას, ვინც რუს ჯარისკაცებზე "ყალბ" ინფორმაციას გაავრცელებს.

დოჟდი რუსეთში 2010 წლიდან მუშაობს. პუტინის ხელისუფლებისადმი კრიტიკული ტონის გამო, რუსეთმა ის "უცხო ქვეყნის აგენტად" გამოაცხადა. ახლა კი პროკურატურამ ვებგვერდი დაუბლოკა იმის გამო, რომ ომს ომი უწოდა და არა სამხედრო ოპერაცია, როგორც ამას პუტინის პროპაგანდა ფუთავს.