დღეს თბილისის სახელმწიფო უნივერსიტეტის მეორე კორპუსსა და ყოფილ ლეჩკომბინატს შორის არსებულ ქუჩას, საზოგადო მოღვაწის, ლიზიკო ქავთარაძის სახელობის ქუჩა ეწოდა.

ჰაინრიჰ ბიოლის ფონდის სამხრეთ კავკასიის რეგიონულ ბიუროსა და თბილისის საკრებულოს მემორანდუმის თანახმად, სახელდებისა და სიმბოლიკის კომისია ქუჩების სახელის ცვლილებისას, პრიორიტეტს ანიჭებდა იმ ქალების სიას, რომლებმაც ქვეყნის ისტორიაში მნიშვნელოვანი როლი ითამაშეს, თუმცა ფაქტიურად დავიწყებულები არიან.

2014 წლის დეკემბერში მემორანდუმის ხელმოწერიდან დღემდე, 25 ქუჩას ეწოდა ქალთა სახელები ბიოლის ფონდის მიერ შემუშავებული სიიდან - 50 ქალი საქართველოდან.

ამ ეტაპზე, აღნიშნული სიიდან მხოლოდ 7 სახელი რჩება, რომელიც ჯერ არ ჰქვია თბილისის ქუჩებს და მათი სახელდება მიმდინარე წელს იგეგმება.

"გენდერულად მგრძნობიარე პოლიტიკის შემუშავების მიზანი გენდერული თანასწორობის პრინციპების საჯარო პოლიტიკაში გატარება და ურბანული დაგეგმარების გამჭვირვალობის ხელშეწყობაა. ბიოლის ფონდმა ინიციატივის პირველ ეტაპზე სახელდებულ ქუჩებზე მემორიალური აბრები განათავსა. ამ მიდგომით, სახელდების გენდერულად მგრძნობიარე პოლიტიკის დანერგვამ ხელი უნდა შეუწყოს საზოგადოებისთვის ქალთა გამქრალი ისტორიების თავიდან გაცნობას და საჯარო მეხსიერებაში მათი სახელის დამკვიდრებას" - აცხადებს ფონდი.