უკრაინის პრეზიდენტის ვოლოდიმირ ზელენსკის განცხადებით, უკრაინული ძალები უძლებენ რუსეთის თავდასხმას დონბასის აღმოსავლეთ რეგიონში, ქალაქ სევეროდონეცკის გარშემო. მისი თქმით, სევეროდონეცკთან ბრძოლებში გარკვეული წარმატებებიც აქვთ.

"დონბასში ვითარება მნიშვნელოვნად არ შეცვლილა ერთ დღეში. სევეროდონეცკში გამართულ ბრძოლებში გარკვეული წარმატებები გვაქვს, მაგრამ ჯერ ადრეა ამის თქმა. იქ ახლა ყველაზე რთული მდგომარეობაა", — თქვა ზელენსკიმ ყოველდღიურ ვიდეომიმართვაში.

მან ისაუბრა, რომ დაბომბვა გრძელდება რუსეთის ტერიტორიიდან. მისი თქმით, დროებით ოკუპირებული ტერიტორიები უწყვეტი კატასტროფის ზონაა, რაზეც სრული პასუხისმგებლობა რუსეთს ეკისრება.

სევეროდონეცკში ახლა მთავარი ბრძოლები მიმდინარეობს. როგორც ლუგანსკის ოლქის ადმინისტრაციის ხელმძღვანელმა, სერგეი გაიდაიმ თქვა, ოკუპანტები სევეროდონეცკის 80%-ს აკონტროლებენ. მისი თქმით, გრძელდება ქუჩებში ბრძოლები.