ტრანსგენდერი მსახიობის, ლავერნა კოქსის, ბარბის თოჯინა უკვე შექმნეს. სათამაშოების კომპანია Mattel პრაიდის კვირეულის აღსანიშნად ცნობილ მსახიობსა და LGBTQ+ აქტივისტს 50 წლის იუბილეზე საკუთარ თოჯინას გადასცემს. ლავერნა კოქსის ბარბის თოჯინა ამაზონზე უკვე გამოჩნდა და მას წითელი კაბა ამშვენებს.

"წლების ოცნება იყო, რომ ჩემი ბარბის თოჯინა შეექმნათ. მოუთმენლად ველოდები იმ დღეს, როცა თაროებზე ჩემი თოჯინაც გამოჩნდება და ადამიანებს საშუალება ექნებათ, მათ კოლექციას ტრანსგენდერი ბარბიც შემატონ. იმედი მაქვს, ადამიანები ამ ბარბის დანახვისას იმაზე იოცნებებენ, რაზეც მე ჩემი კარიერის განმავლობაში ვოცნებობდი. ოცნებებისთვის გამოყოფილი სივრცე ძალიან ძლიერი წყაროა, რომელიც გიბიძგებს, იმაზე მეტს მიაღწიო, ვიდრე თავიდან გეგონა, რომ შესაძლებელი იყო", — ამბობს ლავერნა კოქსი.

ფოტო: Getty Images

კოქსის თოჯინა ცნობილი ბრენდის პირველი ტრანსგენდერი ბარბია და იმ გამორჩეული ქალების კოლექციის ნაწილია, რომელშიც დედოფალ ელიზაბეთ II-ის თოჯინასაც ვხვდებით. კოქსი თოჯინას შექმნის პროცესში Barbie-სთან და Mattel-თან თანამშრომლობდა და ბარბისთვის მისი საყვარელი კაბა თავად შეარჩია.

"ძალიან ბევრ ტრანსგენდერი გოგონა იზრდება იმის სურვილით, რომ ასეთი თოჯინებით ითამაშოს. ახლა კი ბარბი სპეციალურად ჩვენთვის შექმნეს", — დასძინა კოქსმა.