მთავარი არხის დირექტორის, ნიკა გვარამიას განცხადებით, ქართულმა ოცნებამ მისი დაჭერით საკუთარი თავი დაიჭირა და საქართველოს ევროპული განვითარების პროცესი შეაყოვნა. მისი თქმით, ცივილიზებული სამშობლო ჩვენთვის ევოპაა და "ოცნება" ამას შეაჩერებს, მაგრამ ვერ გააჩერებს.

"ჩემი დაჭერით მე მგონია, რომ "ოცნებამ" დაიჭირა საკუთარი თავი და სამწუხაროდ, არ დაიჭირა, მაგრამ შეაყოვნა საქართველოს ევროპული განვითარება. დახურულ საზოგადოებაში გარღვევას ახდენს არა იდეები, არამედ სუპერიდეები. ჩვენს შემთხევეაში ეს არის სამშობლო. ასე იყო 9 აპრილს, ასე იყო 2003 წელს, ასე იყო 20 ივნისს და ასე იქნება ახლაც. სუპერიდეა არის სამშობლო და ჩვენთვის სამშობლო არის ჩვენი ევროპული წიაღი. ცივილაზაციური სამშობლო ჩვენთვის არის ევროპა. ისინი ამას შეაჩერებენ, უკვე შეაჩერეს, მაგრამ ვერ გააჩერებენ", — ამბობს ის მთავარ არხთან სატელეფონო ინტერვიუში.

გვარამიას თქმით, თანახმაა, რომ მისი პატიმრობის პირობებშიც კი შევიდეს საქართველო ევროკავშირში, მაგრამ ექსპრეზიდენტ მიხეილ სააკაშვილთან დაკავშირებით ამას ვერ იტყვის, რადგან ის კვდება.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: