ჩინურმა სახელმწიფო ავიამწარმოებელმა, COMAC-მა 5 მაისს, შანხაიში, წარმატებით გამოსცადა პირველი დიდი ზომის ავიალაინერი C919. პირველი საცდელი ფრენა ბოლო წლების განმავლობაში არაერთხელ გადაიდო თუმცა, საბოლოოდ, ჩინურმა კომპანიამ შეძლო ამბიციური მიზნის მიღწევა. საერთაშორისო ავიამიმომხილველები C919-ს უკვე უწოდებენ ჩინეთის ამბიციების სიმბოლოს, რადგანაც COMAC-ის საბოლოო მიზანს ეარბასისა და ბოინგისთვის კონკურენციის გაწევა წარმოადგენს.

ფოტო: COMAC

ფოტო: COMAC

C919 158-168 მგზავრს იტევს და განკუთვნილია 5 555 კმ-მდე მანძილზე რეისების შესასრულებლად. C919-ის მთავარ კონკურენტებად მსოფლიოში ყველაზე პოპულარულ თვითმფრინავებს - ბოინგ 737-სა და ეარბას A320-ს ასახელებენ. C919 სწორედ აღნიშნულ თვითმფრინავებს ჰგავს პარამეტრებით.

როგორც მწარმოებელი კომპანია COMAC აცხადებს, 23 ავიაკომპანიისგან უკვე მიიღეს შეკვეთა 570 ერთეულზე. სავარაუდოდ, ჯერ კიდევ რამდენიმე წელი იქნება საჭირო, სანამ C919 კომერციულ ავიარეისებს შეასრულებს. აღნიშნული დრო აუცილებელია იმისთვის, რათა თვითმფრინავმა საერთაშორისო ავიაციის სააგენტოს ყველა რეგულაცია ზედმიწევნით დააკმაყოფილოს.

ფოტო: COMAC

ფოტო: COMAC

ავიალაინერს, ძირითადად, ჩინური ავიაკომპანიები ყიდულობენ შიდა რეისების შესაძენად. მიუხედავად იმისა, რომ თვითმფრინავი უცხოელი მწარმოებლების მიერ მოწოდებული ნაწილებითაა აწყობილი, მას ჩინეთში მორიგი "ჩინური ოცნების ახდენას" უწოდებენ.