ცოტა ხნის წინ თალიბანმა ავღანელ ქალებს კიდევ ერთი შეზღუდვა დაუწესა — ტელეწამყვან ქალებს სახის გამოჩენა აეკრძალათ. ახალი შეზღუდვა მაისში დაწესებული კანონის ერთგვარი გაგრძელებაა, რომლის მიხედვითაც, საჯარო სივრცეში სახე ყველა ქალს დაფარული უნდა ჰქონდეს — წინააღმდეგ შემთხვევაში მათ კაც ნათესავებს დაჯარიმება ან თავისუფლების აღკვეთა ემუქრებათ.

ქაბულში ქალების ნაწილმა, მათ შორის ტელეწამყვანებმა, ახალ კანონებს წინააღმდეგობა გაუწია, თუმცა უშედეგოდ. თალიბანმა ახალი კანონი ყველა მოქმედ მედიას გააცნო. პოპულარულ არხზე, სახელად TOLOnews-ზე კანონის განხილვის შემდეგ ქალები შეზღუდვას დაემორჩილნენ, თუმცა პროტესტის გამოსახატავად არხის ტელეწამყვანი კაცები პირდაპირ ეთერში პირბადეებით გამოჩნდნენ.

"ვერ ვსუნთქავ, ჟანგბადს ვერ ვიღებ. ჩვენ სიტყვები სწორად უნდა წარმოვთქვათ. ახალი ამბების პირბადით წაკითხვა ძალიან რთულია", — ამბობს 27 წლის ტელეწამყვანი ქალი.

ამ ინიციატივას, სახელად #FreeHerFace, სხვა არხების ტელეწამყვანი კაცებიც შეუერთდნენ:

"როცა დავინახე, როგორ გაიკეთა ჩემმა კოლეგამ პირბადე, რათა პირდაპირ ეთერში ესაუბრა, ცრემლები წამომივიდა. პროტესტის ნიშნად პირბადის გაკეთება მეც გადავწყვიტე", — ამბობს ერთ-ერთი ტელეწამყვანი კაცი.

"კაც ჟურნალისტებს ნიღბები უკეთიათ. ეს შესანიშნავი ნაბიჯია. ეს იმ იშვიათ შემთხვევათაგანია, როცა ავღანელი კაცები რაღაც სიმბოლურს აკეთებენ, რადგან აქამდე სახის დაფარვას მხოლოდ ქალები აპროტესტებდნენ. საკითხავი ისაა, მოირგებენ თუ არა ისინი ჰიჯაბს? ჩაიცვამენ თუ არა ბურკას, თუ ამას მოსთხოვენ? რამდენად შორს შეუძლიათ წასვლა? მთელმა ქვეყანამ ბურკა რომ ჩაიცვას? რა უნდა ვუყოთ ამდენ ბრაზსა და ემოციას?" — ამბობს ავღანელი ფემინისტი და აქტივისტი საჰარ ფეტრატი.

აღსანიშნავია, რომ თავდაპირველად ავღანელმა ტელეწამყვანმა ქალებმა სახის დაფარვაზე უარი განაცხადეს, თუმცა თალიბანის მთავრობის განცხადებით, ამ შემთხვევაში ტელეარხების ხელმძღვანელობა დაჯარიმდება. ხოლო თუ ქალები ახალ წესს არ დაემორჩილებიან, მაშინ ისეთ სამუშაოზე უნდა გადაიყვანონ, რომლის შესასრულებლადაც მათი პირდაპირ ეთერში გამოჩენა საჭირო არ იქნება.

ავღანეთში ბოლო კვირების განმავლობაში ქალების თავისუფლება მნიშვნელოვნად შეიზღუდა. ავღანელ ქალებს მხოლოდ კონკრეტულ დღეებში აქვთ საჯარო სკვერების მონახულების უფლება, ხოლო გრძელ გზაზე მეურვე კაცის გარეშე გადაადგილება ეკრძალებათ.