ქართული ოცნების თავმჯდომარის, ირაკლი კობახიძის განცახდებით, 2017 წელს რუსთავი 2-ის საქმეზე საელჩოების განცხადებებმა ნიკა გვარამიას შესაძლებლობა მისცა, რამდენიმე მილიონით დამატებით გაეძარცვა არხი. ასე უპასუხა კობახიძემ ჟურნალისტის კითხვას საქართველოში აშშ-ის საელჩოს გუშინდელ განცხადებაზე ნიკა გვარამიასთან დაკავშირებით.

"ზუსტად იგივე განცხადებები კეთდებოდა 2017 წელსაც და ზუსტად იგივე განცხადებებმა, მათ შორის ეს იყო საელჩოების განცხადებებიც, მისცა გვარამიას საშუალება, რამდენიმე მილიონით დამატებით გაეძარცვა რუსთავი 2. დღესაც გვაქვს იგივე სახეზე, რა დგას ამის უკან, მე არ ვიცი, მაგრამ ეს არის ფაქტი, ეს არის მოცემულობა", — ამბობს ის.

კობახიძის თქმით, არ იცის რა შეიძლება იდგეს აშშ-ის საელჩოს განცხადების უკან და იმედს იტოვებს, რომ ის "არასწორად არის ინფორმირებული". თუმცა, ქართული ოცნების თავმჯდომარემ ამჯერად საელჩოს განცხადება ნაციონალურ მოძრაობას არ დაუკავშირა და თქვა, რომ ქართულ ოცნებას არ აქვს იმის ილუზია, რომ ენმ ამხელა მასშტაბის კოორდინაციას ახორციელებს.

"რა თქმა უნდა, ჩვენ არ გვაქვს იმის ილუზია, რომ ნაცმოძრაობა ამხელა მასშტაბის კოორდინაციას ახორციელებს, ბუნებრივია, ჩვენ ამას არ და ვერ ვიტყვით, მაგრამ არის ძალიან სამწუხარო მოვლენა, რასაც სჭირდება ფაქტის კონსტატაცია, შეფასებაში ჩვენ ვერ შევალთ. ყველას მოვუწოდებთ, არ გაიმეორონ იგივე, რაც გააკეთეს 2017 წელს, როცა გვარამიას მისცეს დამატებით რამდენიმე მილიონით რუსთავი 2-ის გაძარცვის საშუალება და პრაქტიკულად, გაუადვილეს მას იმ დანაშაულის ჩადენა, რომელიც მიმართული იყო მედიასაშუალების, ტელეკომპანიის წინააღმდეგ", — ამბობს ის.

კობახიძის თქმით, "კონკრეტულმა კრიმინალებმა ჩაიდინეს კონკრეტული კრიმინალი" და ყოველგვარი დასაბუთების გარეშე კრიტიკული განცხადებები კრიმინალისთვის ხელის დაფარების გარკვეული ფორმაა.

ამის შემდეგ ჟურნალისტმა კობახიძეს ჰკითხა, მისი ეს განცხადება ნიშნავს თუ არა იმას, რომ აშშ-ის საელჩო ხელს აფარებს კრიმინალს, რაზეც მან უპასუხა, რომ არ სჭირდება ჩაკითხვები და "კრიმინალ გენერალურ დირექტორს" მიხედონ.

გუშინ, 16 მაისს სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

საქართველოში აშშ-ის საელჩო განაცხადა, რომ ამ დროს, როდესაც საქართველოს ევროატლანტიკური ინტეგრაციის გაღრმავების უპრეცედენტო შესაძლებლობა აქვს, სისხლის სამართლებრივი დევნის პოლიტიზირებულად აღქმაც კი ზიანის მომტანია.

ამავე თემაზე: